Өткен жылы Шымкент қаласы бойынша шетелдік жұмыс күшін тартуға 2145 бірлік квота бөлінген. Бөлінген квота негізінде 36 кәсіпорын мен ұйымдар 504 шетел азаматына және 12495 қазақстандық азаматтарға жұмыс жасауға рұқсат берген. Тартылып жатқан шетел жұмыс күшінің білікті мамандарының үлесі 95,2%-ды құрайды.
Бұл туралы «Шымкент қаласы кәсіподақтар орталығы» аумақтық кәсіподақтар бірлестігінің төрағасы Берік Бекжанов айтты.
Өткен жылдың қорытындысы бойынша 10 мекеменің 1293 жұмыскері алдындағы 192,8 млн. теңге жалақы қарызы анықталған. Жүргізілген жұмыстардың нәтижесінде 3 мекеме жұмысшыларының жалақы қарызы толық өтелген. Жалпы 179,0 млн. теңге жалақы қарызын өтеу нәтижесінде 1220 жұмыскерлердің еңбек құқықтары қорғалған.
- «Еңбек қорғау және еңбек қауіпсіздігі бойынша 1405 өндірістік кеңес құрылды. Қала аумағында еңбек қауіпсіздігін сақтау бойынша 608 тексеру жүргізілді. Атап айтқанда, өндірістік кеңестің бастамасымен - 172, жұмыскерлердің бастамасымен-134 тексеру жұмыстары жүргізілді. Нәтижесінде 538 еңбек заңдылықтарын бұзушылық анықталып, ол ескертпелер толығымен түзетілді», - деді Берік Айдарбекұлы қалалық ақпараттық коммуникациялық орталығында өткізген брифингінде.