Осы жылы наурыз айында Қытайда өткізілуі тиіс болған жеңіл атлетикадан жабық кешендегі әлем чемпионаты келесі жылға қалдырылды. Бұл туралы Халықаралық федерацияның баспасөз қызметі хабарлады.
13-15 наурызға белгіленген турнир Нанкинде өтуі тиіс еді. Алайда, коронавирусқа байланысты Халықаралық жеңіл атлетика федерациясы турнирді басқа елге ауыстырудан бас тарту туралы шешім қабылдады. Өйткені бұл өзгеріс ұзақ уақытты алуы мүмкін.
- Біз жарысты басқа елде өткізу мүмкіндігін қарастырдық. Осы ретте чемпионатты қабылдауға ерікті түрде қатысқан қалаларға алғыс білдіреміз. Алайда вирустың Қытайдан тыс жерде таралуы туралы алаңдаушылық білдіре отырып, біз бұл ұсыныстан бас тарту туралы шешім қабылдадық. Өйткені бұл ұзақ уақытқа созылуы мүмкін, - делінген хабарламада.
Еске сала кетейік, соңғы мәліметтер бойынша, Қытайда коронавирустан зардап шеккендер саны 170-ке жетті. 7771 адам жұқтырған деп тіркелді.