Елімізде параның мөлшері өсті. Бұл туралы Нұр-Сұлтан қаласында өткен республикалық кәсіпкерлер форумында «Атамекен» Ұлттық кәсіпкерлер палатасының басқарма төрағасы міндетін атқарушы Ербол Үстеміров айтты, деп хабарлайды RGMEDIA.KZ ақпарат агенттігі.
– Біз 2019 жылы сыбайлас жемқорлық деңгейін анықтау үшін нақты әлеуметтік зерттеу жүргіздік. Зерттеу қорытындысы бойынша параның орташа мөлшері, сыбайлас жемқорлық мөлшері ең жоғары аймақтар, параны көп алатын мемлекеттік органдар анықталды, – деді ол.
Оның айтуынша, сыбайлас жемқорлықпен қатысы бар кәсіпкерлер саны төмендегенмен, жалпы параның орташа мөлшері өскен.
– 2018 жылы параның орташа мөлшері 193 мың теңге болса, 2019 жылдың қорытындысы бойынша 205 мың теңгеге өскен. Батыс Қазақстан, Маңғыстау, Атырау, Қызылорда облыстарында сыбайлас жемқорлық деңгейі жоғары болса, Қостанай, Қарағанды, Шығыс Қазақстан облыстары мен Нұр-Сұлтан қаласында сыбайлас жемқорлық деңгейі төмен, – деді Ербол Үстеміров.