Түркістан облысында 164 мың 162 шетелдік пен азаматтығы жоқ тұлғалар уақытша тіркелген. Бұл туралы облыстық Полиция департаментінің бастығы, полиция генерал-майоры Қайрат Дәлбеков ел алдындағы есебінде айтты, деп хабарлайды RGMEDIA.KZ ақпарат агенттігінің Түркістан қаласындағы тілшісі.
– Өткен жылдың қорытындысымен Түркістан облысында жалпы 164 мың 162 шетелдік пен азаматтығы жоқ тұлғалар уақытша тіркелген. Сонымен қатар көші-қон заңнамасын бұзған азаматтарға 27 млн. 961 мың 221 теңге айыппұл салынып, толығымен өндірілді, – дейді полиция генерал-майоры.
Дәлбековтің дерегіне сүйенсек, былтыр облысқа 54 мың 9 шетелдік еңбек иммигранты келген.
– Биылдан бастап шетелдіктердің тіркелу тәртібі бойынша заңға өзгеріс енгізілді. Яғни, сіз шетелдіктің келуі, болуы мен оның уақытша тұруы бойынша Көші-қон орталығы қызметкерлерін 3 тәулік ішінде хабардар етуіңіз тиіс. Себебі сіз үйіңізге келген қонақтың немесе жұмыс жасауға келген жұмысшы үшін Қазақстан азаматы ретінде жауаптысыз. Егер осы талаптар орындалмаса сіз ҚР ӘҚБтК-нің 518-бабына сәйкес әкімшілік жауапкершілікке тартыласыз, – деп түсіндірді департамент бастығы ел алдындағы есеп беру жиынына жиналған жұртқа.