Шымкентте үш күнге жалғасқан «Көрпе Fest» мегафестивалінде 300-ге жуық әйел тігін өнерін тегін үйренді. Қатысушылар этнодизайнер Ырза Тұрсынзада қызынан қолданбалы өнер бағытында кеңес алып, күрделі технологияларды меңгерді.
– Төл өнерді жаңғыртқан бұл іс-шараға Шымкенттен және аудан-ауылдардан үй шаруасындағы және көпбалалы аналар атсалысты. Бұл жетістік көңіл қуантады. Әрі қарай кәсіп ашып, істі жалғастыру керек, – деген қала әкімі барлық аналар мен қыз-келіншектерді халықаралық әйелдер күнімен құттықтады.
Фестивальде жұмыстары үздік деп танылған 46 әйелге тігін машинасы сыйға тартылды. 50 әйел арнайы сертификат иеленді. Ұлттық қолөнер мегафестиваліне қатысушылардың ең үлкені 74 жастағы алтын құрсақты ана Гүлжахан Сайпова болса, ең кішкентайы 10 жасар – Жәудір Бағдатқызы.