Түркістан облысы Келес ауданында 16 көшеге жөндеу жүргізу жоспарланып отыр. Бұл жұмыстар «Ауыл ел бесігі» бағдарламасы аясында атқарылмақ, деп хабарлайды ҚазАқпарат тілшісі.
Аудандық жолаушылар көлігі және автомобиль жолдары бөлімінің басшысы Санжар Амангелдиевтың айтуынша, өткен жылы аталған бағдарлама аясында аудан орталығының 23 көшесі жөнделген. Ағымдағы жылы Ақтөбе ауылдық округінде 12, Абай ауылында 4 көше қалпына келтірілмек.
«Ауданда тек көше құрылысы емес, қосымша абаттандыру жұмыстары жүргізіледі. Яғни, ойын алаңшалары, аяқжол, көшені жарықтандыру жұмыстары да қатар жүреді. Тағы қосымша аудандық бюджет есебінен 10 ауылдық округтегі 17 көшені жөндеу қарастырылып отыр», - дейді Санжар Амангелдиев.
Бөлім басшысының сөзінше, жол жөндеу бойынша мемлекеттік сатып алу конкурсының жеңімпазы анықталған. Аталған 16 көшенің 15-ін «QazaqStroyZhol» ЖШС мекемесі қайта қалпына келтірмек.
