Көрші Өзбекстанның көрермендері енді Қазақстанның телеарналарын тамашалай алады. Астанада өтіп жатқан ІІ Орталық Азия медиа форумында Өзбекстан Республикасы Президенті Әкімшілігі жанындағы Ақпарат және қоғамдық коммуникациялар агенттігінің директоры Асаджон Ходжаев айтты, деп хабарлайды rgmedia.kz тілшісі. Сондай-ақ ол "Орталық Азия ынтымақтастығы" ұйымына мүше елдердің ұлттық арналарын бір-бірінің эфирлік желісіне енгізу тәжірибесін жолға қою қажет екенін атап өтті. Бұл мәдени-гуманитарлық байланысты кеңейтіп, халықтар арасындағы диалог арналарын ашуға, ортақ мәдениетті бірлесе дамытуға серпін беретінін айтты.
"Өзбекстанда ел аумағында көрсетілетін шетелдік телеарналар тізіміне Әзербайжан, Қазақстан, Түрікменстан және Түркия телеарналары енгізілді. Алайда трансляцияны ұйымдастыруда әлі де жұмыс атқару қажет деп есептейміз. Сондықтан біз Қазақстан Республикасының ұсынысын қолдаймыз. “Жібек жолы”, халықаралық Silk Way телеарнасы базасында барлық мемлекеттердің мүддесіне қызмет ететін және ортақ ақпараттық алаңымыз болатын арнаға айналуына қолдау білдіреміз. Біз осы арнаның жұмысына белсенді түрде қатысуға дайынбыз" , - деді ол.