Ұлттық дәстүрдің қайнарларына жыл он екі ай бойлайтын отбасылар бар. Олар «Өмірім – менің өнерім» дейтін жандар. Осындай отбасылардың бірі Болатбек Бейісбековтің шаңырағы.
Әулетте Қазақстан Суретшілер одағының жеті мүшесі, Қазақстан Қолөнершілер одағының бес мүшесі бар. Олардың ата-бабалары қолөнермен айналысқан, бұл әулеттің өнердегі өз жолы, өзінің дара стилі, өзіндік қолтаңбасы қалыптасқан. Бейісбековтер сурет салып, түскиіз тоқиды, жүннен кілем, былғарыдан бұйым жасайды. Ұлттың мәйегін, құндылығын жоғалтпай халыққа бар бояуымен ұсынып жүрген отбасында сегіз адам шығармашылықпен айналысады. Олар: Болатбек Бектасұлы Бейісбеков, Күләш Айдарбекова, Берік Болатбекұлы Бейісбеков, Мәдина Нұрланқызы Ахметова, Венера Болатбекқызы Бейісбекова, Ақбота Болатбекқызы Бейісбекова, Арайлым Болатбекқызы Бейісбекова, Нұрай Берікқызы Бейісбек. Үлкен шығармашылық әулетте Қазақстан Суретшілер одағының жеті мүшесі, Қазақстан Қолөнершілер одағының бес мүшесі бар. Арғы ата-бабалары қолөнерімен айналысқан отбасының бүгінгі ұрпақтары ұлттық өнерімізді дәріптеуге сүбелі үлес қосып келеді.
Айта кетейік, ұлттық өнер арқылы адал еңбекпен ұрпақтарына үлкенге құрмет, кішіге ізет көрсету, өзара қамқорлық, мейірім мен жарасымдылық секілді отбасы құндылықтарын да бойына сіңірген Болатбек аға қазір отбасынан бөлек қаншама жастарға адал еңбекті насихаттап жүрген асыл жар, аяулы әке, қамқор ұстаз.
«Адамның ниеті мен ынтасы болса, істеген жұмысын жақсы көріп тұрса, кез келген шаруа қиынға соқпайды. Керісінше, істеген сайын шабыттана түсесіз. Жұмысыңыз жақсы шығып, халық оны бағалап жатса, туындыны одан да жақсы жасауға тырысасыз» – дейді Болатбек Бейісбек.
Болатбек Бектасұлы – шығармашылық жетістіктерінің арқасында Түркіменстан, Казань,Турция, Ташкент, Германия, Қытайда өткен дүние жүзілік қолөнер шеберлерінің 50 жылдық мерейтойында, Индия, Вьетнамда және алыс-жақын шетелдерде көрме, симпозиумдарға қатысып, қазақ қолөнерін насихаттауда. Жары Айдарбекова Күләш Өсерқызы да жолдасы Б.Бейсбековпен қолөнердің құндылығын қарыштатып келеді. Өнерлі отбасында алты баланы тәрбиелеген алтын құрсақты ана мен ардақты әкенің төрт баласы қазақ өнерінің жанашырларына айналған.
Ұяда не көрсең, ұшқанда соны ілерсің демекші, Болатбек Бектасұлының отбасылық өнері ата-бабасынан бастау алған. Бүгінде бұл өнер ұрпақтан-ұрпаққа жалғасып, жанұядағы мектеп қабырғасында жүрген балаларына дейін дарыпты. Бір жағадан бас, бір жеңнен қол шығарып, зор еңбекпен жүзеге асырған өнерлі отбасының орасан жұмысы халыққа берер үлгі-өнегесі мол, қайталанбас туындылар. Олардың әрқайсысы автордың өзгеге ұқсамас, өзіне тән қолтаңбалық шеберліктерін айқындайтын бұйымдар. Оның нәтижесі бұған дейін өткізілген «Асылмұра», «Шаңырақ», «Туғанжерге тағзым», «Көктем үні» атты отбасылық шығармашылық көрмелерінде көрініс алған.
Былтырғы өткен "Мерейлі отбасы – 2023" ұлттық байқауға қатысып, лауреат атанған.
– Мерейлі отбасыға, осындай биікке жеткізген қазақтың төл өнері деп есептеймін. Осы ата-баба өнерін істеген кезде тәлім-тәрбиенің бәрі айтпай-ақ беріліп жатады ғой. Соның арқасында жақсы болып жүрміз. Президенттің құттықтауында: "Бұл - төл құндылықтарымызды дәріптеп, ұлттың жаңа сапасын қалыптастыруға жол ашатын маңызды жоба. Халқымызда "Ұяда не көрсең, ұшқанда соны ілерсің" деген жақсы сөз бар. Отаншылдық, білімпаздық, еңбекқорлық, үнемшілдік, жанашырлық, әділдік сияқты "Адал азаматқа" тән қасиеттер, ең алдымен, отбасында қалыптасады. Әділетті Қазақстанды осындай жандар құрайды. Мемлекет отбасы институтын дамытуға, ана мен баланы қорғау мәселесіне әрдайым айрықша назар аударады", - делінген. Ұлттық тәрбиені ұлықтап,отбасындағы осы игі дәстүр мен асыл қасиетті жас ұрпақтың бойына сіңіру өмірдегі ұстанымым, – дейді Болатбек аға.
