Бәйдібек ауданы, Ағыбет ауылдық округінің орталығында спорт мектебінің құрылыс жұмысы аяқталуға жақын. Аудан әкімі Ержігіт Шәріпбеков аталған спорт мектебінде болып, атқарылып жатқан құрылыс жұмыстарын бақылады.
- Спорт кешенінің аумағы – 0,60 гектарды құрайды. Жобаға сәйкес нысанда бір ауысымда 20 оқушы спорттың бірнеше түрінен шынығып, шыңдалатын болады. Жаттықтырушы залы, киім ауыстыру мен жуынатын және медпункт, құрал-жабдықтар сақтайтын бөлмелері қарастырылған, - дейді аудан әкімі.
Аудан әкімі Ержігіт Шәріпбекұлы нысанды аралау барысында жауапты бөлімге бірінші кезекте сапасын қадағалауды, құрылысты жүргізіп жатқан мердігер мекемеге жұмысты қарқынды жүргізіп, аяқтауды тапсырды.
Сонымен қатар, Бәйдібек ауданында соңғы жылдары оқушылар үшін салынып жатқан нысандар қатары артып келеді. Атап айтсақ, соның бірі Шаян ауылында соғылып жатқан ан 100 мың кітап қорына арналған аудандық орталық кітапхананың құрылысы жүргізіліп, тамыз айының соңына дейін пайдалануға берілмек.
Бүгінде екі қабатты ғимараттың сыртқы қабатын қаптау мен ішкі бөлмелерін әрлеу жұмыстары жүргізіліп жатыр. Сондай-ақ, кітапханада жеделсаты орнатылмақ.
Осы нысанның да құрылыс жұмысымен танысқан аудан әкімі Ержігіт Шәріпбеков ғимараттың ішін аралап көрді. Сонымен қатар, құрылысты жүргізіп жатқан мердігер мекеменің басшысымен кездесіп, жоспарланған мерзімде аяқтауды тапсырды.
Одан бөлек, аудан әкімі аудан орталығындағы асфальт бетон жамылғысын төсеуге дайындық жұмыстары жүргізіліп жатқан бірқатар көшелерді аралады. Жауапты бөлімге жұмысты барынша ширатып, орын алып жатқан кемшіліктерді қалпына келтіріп, сапалы атқаруды тапсырды.
