Түркістан қаласындағы Назарбаев Зияткерлік мектептерінің шахматшы зияткерлері арасындағы дәстүрлі турнирдің екінші күні түркістандық зияткерлер үшін сәтті аяқталды. Ақыл-ой жарысына белсенді қатысатын мектеп оқушылары бүгінгі ойынның тартысты өткенін айтады. Мектеп мақтанышына айналған тәжірибелі шахматшы зияткер Альбина Лесова жарысқа қатысу арқылы ойнау логикасымен қатар, зейінділікті дамытуда қабілеттері шыңдала түсетінін жеткізді:
- Желілік спартакиадаға қатысу арқылы мен өз қабілеттерімді дамытып, шыңдала түсемін. Себебі қарсыластарым жеңісті қолдан бере салатын жай ойыншылар емес, олардың ойын тактикалары да бөлек. Дәстүрлі турнирге екінші рет қатысып жатқан соң былтырғы нәтижеден қарағанда, биыл жақсы көрсеткіш көрсетіп жатырмын. Онымен қоса, қарсыластарыммен тартысты ойын өтіп жатыр, - деп өз ойымен бөлісті.
10-11 сыныптар бойынша қатысып жатқан мектеп оқушысы Бобомурод Тажиддинов шахматқа деген қызығушылығы жайлы өз естеліктерімен бөлісуде ойынның маңыздылығын айшықтап берді:
- Менің шахмат ойынына ерте жастан атам баулыған болатын. Бала кезімнен бастап, атаммен бірге шахмат тақтасын алып, түрлі ойын жүрістері мен тактикаларын меңгеруде бұл спортқа деген қызушылығым ерекше болды. Міне, бүгінде NIS-тің мықты шахматшыларымен бірге қарсыласып, бақ сынаудамын. Ойыншылардың әр тур сайынғы дебюті мен ойын жүрістері өзгеше. Алдағы уақытта жақсы нәтиже көрсетемін деген ойдамын, - деп өз ойын ашық жеткізді.
Еске сала кетейік, шахматтан желілік спартакиада 7-9 қараша күндері аралығында «lichess.org» платформасында онлайн өтіп жатыр.