Түркістан қаласы химия-биология бағытындағы Назарбаев Зияткерлік мектебіндегі «Даналық бейсенбі» жобасының кезекті шығарылымына Назарбаев университеті қабылдау комиссиясының өкілі Әсел Жексенбекова келіп, еліміздегі ең беделді жоғары оқу орнына түсу мүмкіндігі туралы түркістандық зияткерлерге маңызды ақпараттармен бөлісті.
Назарбаев университеті – жоғары сапалы білім мен көптеген перспективалық бағдарламалар ұсынатын халықаралық деңгейдегі еліміздегі жетекші оқу орындарының бірі.
Кездесуде Әсел Жексенбекова NU-ға оқуға түсуге құжаттарды тапсыру мерзімі туралы айтып, болашақ студенттерге жоғары талаптар қойылатынын және оқу процесі ағылшын тілінде жүргізілетінін түсіндірді.
NU-дың стратегиялық даму моделі әлемнің үздік университеттерінің рейтингісіндегі жетекші жоғары оқу орындарымен әріптестікке негізделген. Өз презентациясында Әсел Жексенбекова университеттің әр мектебі мен зерттеу орталығы әлемнің жетекші университеттерімен және ғылыми орталықтарымен ынтымақтастық орнатқанын жеткізді.
10-11 сынып оқушылары қатысқан басқосуда зияткерлер жоба қонағына NU-дың оқу бағдарламасы мен жетекші мамандықтарға қатысты сұрақтар қойып, университеттің берер мүмкіндіктері жайлы толық ақпарат ала алды.