Қазығұрт аудандық білім бөліміне қарасты Д.Қонаев атындағы жалпы білім беретін мектебінде тіл апталығы мен зорлық-зомбылыққа қарсы дөңгелек үстел өтті. «Тіл ғұмыры – ұл ғұмыры» атты апталыққа 1-11-сынып оқушылары атсалысты.
Оның ашылу салтанатында мектеп басшылары ұжымды, оқушыларды құттықтап, Мемлекеттік тілдің басқару тілі екенін пән мұғалімдері насихаттады. «Тіл мәртебесі – ел мерейі» тақырыбында 5-6-сынып оқушылары арасында диктант жазудан байқау, «Тіл тұмар – бір шынар» тақырыбында кітап көрмесі өткізілді.
«Үш тіл білу – заман талабы» атты тақырыпта 8,9-сынып оқушылары арасында пікірсайыс ұйымдастырылды. Ол сайыста өткір пікірлерімен ұтымды ой айта білген 9-сынып оқушылары жеңімпаз атанды. Қазақ тілі мен әдебиеті пәнінің мұғалімі А.Жақсыбаева «Бақа мен үйрек» тақырыбында 5а-сыныбында ашық сабақ өткізді, сабаққа енген пән мұғалімдері оң пікірлер білдірді, сабақ өз дәрежесінде өткізілді.
«Сүйіспеншілік –тіршіліктің негізгі тірегі» тақырыбында 7а-сыныбында ашық сабақ өткізілді, сыныптағы оқушылар өте белсенді, берілген тапсырмаларды тыңғылықты орындады, сабақ өз мақсатына жетті. Ал апталық соңында апталықта өз білімдерін көрсеткен оқушылар мектеп басшылығы тарапынан марапатталды.
Ал мектеп басшылығының бастамасымен ұйымдастырылған «Қатыгездік және зорлық-зомбылықсыз балалық шақ» республикалық ақпараттық акциясы аясында «Зорлық-зомбылықтың алдын алу» тақырыбында дөңгелек үстел өтті.
Қазіргі кезде бүкіл әлемде ата-аналардың және де өзге ересектердің балаларға зорлық-зомбылық және қатігездік көрсету, оларды ауызша агрессияға тартуы, кәмелетке толмағандарға эмоционалды және физиологиялық зорлық-зомбылық көрсетулері проблемаға айналып отыр.
Дөңгелек үстел барысында оқушылар өз ойларын кеңінен таратып айтты. Балаларға қамқорлық жасау, баланың абыройы мен құқықтарын құрметтеу – бұл тек мемлекеттің ғана емес, сонымен қатар жекелеген әрбір адамның міндеті екенін естен шығармауымыз қажет. Үзіліссіз ұрпақ тәрбиесіндегі қос босаға-тәртіп пен мәдениет күллі адам атаулының күнделікті әдеттеріне айналған кезде, біздер мейірімі мол, қайырымды қоғамды құрып ғана қоймай, зорлық-зомбылықсыз балалық шақтың шаңырағын биіктете түскен болар едік. Бейбіт ел, ынтымағы жарасқан халық, үлгілі отбасын құру бәрі де адамның өз қолында, - деп өз ойларын қорытындылады.
