Төлеби ауданының оқушылары түрлі білім сайыстарында топ жарып, аудан намысын облыстық және республикалық байқауларда қорғап жүр. Сол биіктен Б.Биболатұлы атындағы орта мектептің 7-сынып оқушысы Думан Жақсылық та көрінді.
Б.Биболатұлы атындағы орта мектептің басшылығы өз шәкіртінің жетістігін жоғары бағалап отыр. «Біздің оқушыларымыз аудандық, облыстық байқауларға қатысып, жүлделі орындардан көрінуде. Республикалық байқауларға жолдама алғандары да баршылық. Мәселен, жуырда облыстық «Фараб» ғылыми-әмбебап кітапханасы мен республикалық «Ақылдым» журналы ұйымдастырған «Ақылды балаға – сыйлыққа «Ақылдым» акция-байқауына біздің мектеп оқушысы қатысты. Аталмыш акция-байқаудың ақтық кезеңінде 18 бала сынға түскен болатын. Ақтық сында мектебіміздің 7-сынып оқушысы Думан Жақсылық бірінші орынды жеңіп алды. Ол сыныбындағы үздік оқушының бірі, әрбірден кейін Кеңесарық ауылдық кітапханасының тұрақты оқырманы, - дейді мектеп басшылығы.
Байқау жеңімпазы Думан Бақытұлына Дубайға жолдама берілді. Бұл жолдама төлебилік оқушының үш ересек адаммен бірге барып қайтуына мүмкіндік береді.
Сондай-ақ, Думанға Қазақстан Республикасы Оқу-ағарту министрлігі Тәрбие және қосымша білім департаментінің Алғыс хаты, «Ақылдым» журналын алты ай бойы тегін оқуға мүмкіндік беретін сертификат, басқа да сыйлықтар табыс етілді.
Сонымен қатар, байқаудың ақтық кезеңі барысында «Бала жазған ертегі» атты жинақтың тұсаукесері өтті. Осы жинаққа Думанның қиялынан туған ертегісі де енген.
