Сайрам аудандық білім бөлімі балалардың шығармашылық қабілетін арттыру мақсатында түрлі байқаулар мен іс-шаралар ұйымдастырып келеді. Соның бірі жуырда аудандық білім бөлімі аудандық «Жастар ресурстық орталығы» және аудан имамдарының ұйытқы болуымен 7-11-сынып оқушылары арасында «Анаға хат» шығармалар байқауы.
Аудандық білім бөлімінің әдістемелік кабинет меңгерушісі Гүлнар Нұртанованың айтуынша, байқауға барлық мектептен үміткерлер қатысып, өз бақтарын сынаған.
- Мемлекет басшысы Қасым-Жомарт Тоқаев Түркістан қаласында өткен ұлттық құрылтайда жас ұрпақ тәрбиесіне басымдық берген болатын. «Жас ұрпақтың, әсіресе, қазіргі құбылмалы заманда сыни тұрғыдан ойлай білуі маңызды. Балаларымыздың танымы кең болуына жағдай жасауымыз қажет» деп айтқанындай, олардың танымын кеңейту, ой өрісін арттыру мақсатында «Анаға хат» байқауы ұйымдастырылды. Байқаудың мақсаты – ана мен бала арасындағы махабаттың өлшемін дәріптеп, негізін насихаттау, баланың анасына деген алғысын көрсету, ата-ана алдындағы парызын терең сезіне білуі арқылы ұрпақ тәрбиесін ұлықтау, әдебиет, поэзия әлеміне ынтызар оқушының қабілетінің дамуына түрткі болып, оларды марапаттау арқылы құлшынысын ояту, - дейді ол.
Оның айтуынша, аталмыш байқауға аудан мектептерінен қатысуға талап еткен оқушылардың жолдаған 200-ден астам шығармасы келіп түсіпті. Солардың ішінде үздік деген 27 шығарма байқаудың екінші кезеңіне жолдама алған. Екінші кезеңге жолдама алған шығармалардың авторлары әділқазылар алқасы мен көпшілік алдында өз шығармаларын оқып берді.
Әділқазылар шешімімен аудандағы Ш.Рашидов, Аблайхан Ә.Бөкейханов және Көмешбұлақ атындағы жалпы білім беретін мектебінің оқушылары Отарбек Ирисқұлов, Өсер Ерсанат, Гүлназ Үсенбай Гулназ және Ұлмекен Эрдавлетова арнайы номинацияларға ие болды.
Ал, жүлделі орындарға ие болған оқушылар үш орын болынша анықталды. Үшінші орын №30 Ы.Алтынсарин, М.Өзтүрік және А.Байтұрсынов атындағы жалпы білім беретін мектебінің оқушылары Аида Маханбетова, Ажарлым Жүрсынбек және Мейірім Жансерікқызына берілді. 2-ші және 1-ші орыннан Н.Шойынбаев атындағы жалпы білім беретін мектебінің оқушысы Айсұлтан Абильдабекұлы мен М.Өзтүрік атындағы мектептің оқушысы Кәусар Жексенбекова тұрақтады. Ал 52 М.Өзтүрік атындағы жалпы білім беретін мектебінің оқушысы Анель Есалыға байқаудың бас жүлдесі бұйырды.
Жеңіс тұғырынан көрінген барлық оқушылар арнайы дипломдар мен бағалы сыйлықтар табысталды.
