Ордабасы аудандық білім бөліміне қатысты мекемелерде педагогтердің қатысуымен байқаулар мен семинарлар ұйымдастырылуда. Соның бірі жуырда Бәйтерек жалпы білім беретін мектебінде ұйымдастырылды. Аудандық білім бөлімінің ұйымдастыруымен өткен «Педагогикалық идеялар фестиваліне» білім ошақтарындағы мектеп алды даярлық тобының мұғалімдері қатысты.
Аудандық білім бөлімінің әдіскерлері Г.Молжігіттің айтуынша, бұл байқаудың басты мақсаты – педагогтердің кәсіби өсуі мен өзін-өзі шығармашылық жағынан жетілдіруін ынталандыру. Сонымен қатар бірыңғай ақпараттық-білім кеңістігінде заманауи педагогикалық тәжірибені жинақтау және насихаттау, педагогтердің ақпараттық-коммуникациялық және технологиялық құзыреттіліктерін арттыру.
- Ұлттың жаңа болмысы білім, ғылым және мәдениет саласын дамыту арқылы қалыптасады. Осы бағытта бізге орасан зор жауапкершілік пен міндет жүктеліп отыр. «Тәрбие тал бесіктен басталатынын» ескере отырып, өскелең жас ұрпақтың бойына адалдық қағидаттарын сіңіреміз десек, ең алдымен оған өзіміз өнеге көрсетер тұлға болуымыз керек» дейді Қасым-Жомарт Тоқаев. Және де Президентіміз біздің ұлттық бірегейлігіміз табыстылықта екенін айтты. Бұл ел дамуының маңызды стратегиясына айналуға тиіс. Әр білім мекемесі өз алдына «Біз қайткенде табысты балабақша, табысты мектеп, табысты колледж бола аламыз» деген мақсат қойып, оған жауап беруге дайын болуы керек деген болатын. Біз сол талаптан шығу үшін алдымызға ауқымды міндеттер мен жоспарларды құрып, сол жоспар аясында жұмыс істеудеміз. Бүгін Бәйтерек жалпы мектебінде ұйымдастырылған байқауға аудан мектептерінен барлығы 22 мектепалды даярлық сынып педагогтері қатысып, өз біліктіліктерін сынады. Жақсы өнер көрсетіп, көрерменнің қошеметіне, әріптестерінің құрметіне ие болды көп ұстаз, - дейді ол.
Байқаудың қортындысы бойынша педагогтердің жұмыстары сараланып, жүлделі орындар берілді. Атап айтсақ, байқауда өзін бар қырынан жақсы көрсете білген Б.Нұрлыбеков атындағы жалпы білім беретін мектебінің мектепалды сынып педагогы Жансая Айходжаева бірінші орынды иеленді. Сөйтіп ол облыста өтетін байқауға жолдамаға ие болды.
ІІ орын Ұлағат жалпы орта мектебінің мектепалды даярлық сынып педагогы Жазира Жүнісбековаға, ІІІ орын Тоқсансай жалпы орта мектебінің мектепалды даярлық сынып педагогы Айдидар Қажымұратқа берілді.
Байқау жеңімпаздары арнайы дипломдармен, бағалы сыйлықтармен марапатталды.
Сондай-ақ Ш.Уәлиханов атындағы мектеп-гимназия базасында ағылшын тілі әдіскері А.Исмагулованың ұйымдастыруымен «Әлемдік толеранттылықтың ғылым мен оқу-ағарту саласында атқаратын қызметін Блум таксономиясы арқылы дамыту» тақырыбында магистрлер семинары өтті. Ардақ Исмагулова мен мектеп-гимназия директоры Шолпан Шәдіқожаның айтуынша, бұл іс-шара да мектепте жоғары деңгейде өткізілген. Олардың айтуынша, жалпы семинарда көзделген масат тұлғаның коммуникативті толеранттылық сипатын қалыптастыру және ХХІ ғасыр дағдыларына икемділігін медиа сауаттылық арқылы меңгеру.
Ғылыми әдістемелік-практикалық семинарда Қажымұқан аумақ әкімшілігіне қарасты мектептердің магистр-педагогтері Абибулла Жакудаев шебер-сынып, Ақерке Жақсылық пен Ұлдана Мұхажыр төңкерілген сабақ (flipped lesson); Абай Маханов TEDx форматында сабақтар өтті, Шоқан Уәлиханов атындағы мектеп-гимназия магистр-педагогтері Айсара Оспанова және Құралай Есенова оқушылармен практикалық сабақтар өтіп үздік әдіс-тәсілдерімен бөлісті.
Семинар соңында қатысушы магистр-мұғалімдер мен жас мамандар өте құнды ақпараттар алғандарын айтып, ұйымдастырушыларға алғысын айтты.
