Қазығұрт ауданында оқушылардың жолда жүру ережесін сақтауға үйрететін дәрістер қатары көбеюде. Әсіресе бастауыш сынып оқушыларының танымын арттыру басты орында тұр. Мәселен, Е.Тасанбаев атындағы жалпы білім беретін мектебінде өткен бастауыш сыныптар арасындағы сайыс сабағы оқушылардың есінде ұзақ сақталып қалары анық.
Мектептің қосымша білім беру педагогы Н.Абжанованың айтуынша, бастауыш сыныптың 4-сынып оқушылары арасында ұйымдастырылған «Ел сенімін ақтаймыз, жол ережесін сақтаймыз!» атты жол ережелерінің алдын алуға бағытталған сайыс сабағы қызықты, балалардың араласуымен тартысты өтіпті.
- Сайыс сабақты 4«а»-сынып жетекшісі Шырын Сейтжаппар мен 4«ә»-сынып жетекшісі Сапаркүл Алауова шебер өткізді. Сабақтың негізгі мақсаты – көшеде жүру ережелері бойынша қалыптасқан қағиданы, өмірдегі маңызын түсіндіру. Балалардың жолда жүру ережесін меңгерту дағдысын қалыптастыру. Іс жүзінде жол ережесін сақтауға үйрету. Бағдаршамның атқаратын қызметімен таныстыру. Көше жағдайындағы кеңістікті бағдарлай білу дағдыларын, зейіндерін дамыту. Сайыста 4-сыныптар екі топқа, атап айтқанда, «Бағдаршам» және «Жолаушылар» болып бөлініп жарысқа түсті. Оқушылардың арасында өте тартысты сайыстар болды. Бірінші сұрақ жауаптар сайысында екі топ біріне сұрақ қойып жауап берді. Екінші сайыс түрі жол ережелеріне байланысты жұмбақтар жасыру. Үшінші сайыста әр топ жол ережелеріне байланысты өнер көрсетті, - дейді Н.Абжанова.
Сайыс сабағы соңынан оқушылар жол ережесін жан-жақты танып, білді.
Бұдан бөлек, оқушылардың құқықтық сауаттылығын арттыру мақсатында Қ.Өмірәлиев атындағы орта мектепте «Зорлық зомбылық және құқық бұзушылық алдын-алу» атты тақырыбта кездесу өтті. Оған мектептің 8-11-сынып оқушылары, аудандық полиция бөлімінің бастығының орынбасары полиция подполковнигі Сапархан Апашов, директордың тәибие ісі жөніндегі орынбасары Азат Тұрлыбаев және жоғарғы сынып жетекшілер қатысты. Жиын барысында, кәмелетке толмағандар арасында қылмыс пен құқық бұзушылықтың алдын-алу және олардың қадағалаусыз және панасыз қалуы мен тұрмыстық зорлық-зомбылыққа қарсы іс-қимыл және жасөспірімдер арасында суицидтің алдын алу, құмар ойынымен есірткінің алдын алу және түнгі мезгілде «Мобильдік рейдтер» кезекшілігінің атқарылуы жайында сөз қозғалды.
