Бәйдібек ауданындағы білім бөліміне қарасты мекемелердің жай-күйімен облыс әкімінің орынбасары Бейсен Тәжібаев арнайы келіп танысты. Алдымен ол Алғабас ауылындағы Майбұлақ жалпы орта мектебінің жұмысымен танысып, ондағы бірқатар жағдайға қанықты. Білім нысанының сыртқы әрлеу жұмыстары, акт залы мен бірқатар сынып бөлмелерін жөндеуден өткізу үшін жоспарға енгізу қажеттігін айтып, жауапты басқарма және бөлімге жүктеді.
Бұдан кейін, Айсана балабақшасында болды. Онда жүргізіліп жатқан жөндеу жұмыстарының барысымен таныса келіп, сала мамандарына құрылыс жұмыстарын сапалы және уақтылы аяқтауды тапсырды.
Сонымен қатар облыс әкімінің орынбасары Боралдай ауылдық округіне қарасты О.Тайманов және Н.Арапов атындағы жалпы орта мектептеріндегі жүргізіліп жатқан жылу жүйелеріне ағымдағы жөндеу жұмыстарын көрді.
Ал Ы.Алтынсарин атындағы негізгі орта мектебі 1987 жылы пайдалануға беріліпті. Ол ауыл тұрғындарының күшімен салынған екен. Ыңғайластырылған 2 жайдан тұрады. Қосалқы 3-ші жайы 1964 жылы салынған. Мектепте 7-сынып бөлмесі бар. Бұл бөлмелердің сыйымдылығы сыныптағы оқушыларға қажетті мөлшерден төмен. Негізгі мектепті аралап көрген соң жауапты аудандық және облыстық басқармаға жаңа типтік жобадағы мектеп құрылысын жоспарға енгізу, жобалық сметалық құжаттамасын дайындауға қаржы қарастыру тапсырылды.
- Бүгінгі таңда облысымыздағы демографиялық өсімі жоғары. Балалардың өсіміне орай облыстағы мектеп тапшылығын шешу мақсатында түрлі бағдардламалар мен жобалар қабылдануда. Қазіргі таңда облыста 1029 мектеп жұмыс істеп тұр. Оның 908-і мемлекеттік болса, 121-і жекеменшік мектеп. Білім ұяларында 519904 оқушы білім алуда, оның ішінде жекеменшік мектепте 31978 оқушы бар. Жалпы жоғарыда айтқанымдай Түркістан облысы демографиялық өсім бойынша елімізде көш басында. Яғни жаңа мектептерге қажеттілік мәселесі жыл сайын туындауы заңдылық. Еліміз бойынша 2021-2025 жылдар аралығында салынып жатқан мектептердің төрттен бір бөлігі – Түркістан облысына тиесілі. Төрт жылда өңірде 199 мектеп бой көтереді. Жалпы білім беру мекемелерінің жетіспеушілігін жою мақсатында жекеменшік мектептерге жан басына шаққандағы қаржыландыру жүйесі де қолға алынған. Яғни, кәсіпкер мектеп салып, онда білім алатын әрбір оқушы үшін мемлекеттік бағдарлама аясында қайтарымсыз қаржыға ие бола алады. Кәсіпкерлерді осы игі іске шақырамын. Ең құнды инвестиция – білімге салынған инвестиция. Ол түбінде ақталады. Өңірде мектеп тапшылығы аумақтар зерделеніп жатыр. Кәсіпкерлермен бірлесе жұмыс атқаруға дайынбыз, – деді Бейсен Тәжібаев.
Оның айтуынша, жалпы облыстағы білім басқармасының мәліметіне жүгінер болсақ, өңірдегі мемлекеттік 728-і типтік болса, 180 мектептің ғимараты ыңғайластырылған. Биылдың өзінде өңірімізде 28 жекеменшік мектеп ашылып, пайдалауға беріліпті. 2023-2025 жылдар аралығында облыста 96 мемлекеттік мектептің құрылысы жүргізу жоспарланған. Бұдан бөлек, 2023-2025 жылдар аралығында «Жайлы мектеп» жобасы аясында облыста жалпы сыйымдылығы 49 мың орындық 63 мектептің іс-шара жоспары бекітіліп, жаңа мектеп салу үшін тиісті жұмыстар атқарылуда. 2024 жылы 29 мектеп, 2025 жылы 34 мектепті пайдалануға беру жоспарланған. Ал 2024-2026 жылдар аралығында облыс бойынша 6512 оқушы орнының тапшылығын, апат алдындағы, үш ауысымды мектептердің және ғимараты ыңғайластырылған мектептердің мәселесін шешу үшін 23 мектеп салу қажет.
Сапар аясында Бейсен Дәулетұлы аудан әкімдігінде тұрғындарға жеке қоғамдық қабылдау өткізіп, өтініштерін тыңдады. Тұрғындар тарапынан мектепке қосымша жай, жаңадан емхана соғу, үй іргелік және егістік жерлер мәселелері айтылды. Білім мен денсаулыққа байланысты көтерілген талап-тілектер назарға алынды. Жерге байланысты айтылған ұсыныстар жергілікті деңгейде шешілетіні түсіндіріліп, заң аясында жауаптары ұсынылды.
