Қазығұрт аудандық білім бөліміне қарасты Қ.Өмірәлиев атындағы жалпы білім беретін мектебінде пән апталықтары ұйымдастырылуда. Апталық барысында математика, қазақ, орыс және ағылшын тілі пәндерімен қатар бастауыш сынып мұғалімдері де ашық сабақ берді.
Атап айтсақ, апталық аясында мектептің математика пәнінің мұғалімі Ақмарал Сахова 6-сынып оқушыларымен «Рационал сандарға арифметикалық амалдар қолдану» тақырыбында ашық сабақ өткізді.
- Қазіргі таңда оқушылардың сабаққа деген қызығушылығын ояту оңай шаруа емес. Сабақты түрлендіріп, жаңа технологияларды қолданбай дәріс бере алмайсың. Өзім де апталық барысында өткізген сабақта жаңа технологияларды қолдана отырып, сабақты түрлендіруге тырыстым. Жалпы оқу мақсаты рационал сандармен арифметикалық амалдарды орындау. Сабақтың өту барысы оқушыға қойылған мақсаты, талаптары, оқушының жас ерекшелігіне, тиімділігіне сай алынған. Сабақ, өткен сабақпен байланыстырылып қызықты «Сиқырлы ұяшықтар» әдісін қолдану арқылы тапсырма орындады, - дейді пән мұғалім.
Оқушылардың қызығушылығын ояту мақсатында пән мұғалімі «Квест» ойынын ойнады, ол ойынды «Қанқыз» қоңыздары арқылы топқа бөлініп есептер шығарып, тапсырмаларды орындады. Бөлім бойынша пәндік құзіреттілігін арттыру көзделген. Пән мұғалімінің сабағы негізгі мақсатына жетті.
Ал 3 «а»-сынып оқушыларымен бастауыш сынып мұғалімі Сәуле Мырза «Жылдам оқуға дағдыландыру» тақырыбында ашық сабақ берді. Мұндағы сабақтың мақсаты да алдыңғы сабақпен ұқсас. Яғни, дәріс барысында оқушылардың креативті ойлауын дамыту.Сыни ойлау дағдыларын қалыптастыру. Есте сақтау қабілеттерін арттыру.
Бұдан бөлек, химия пәні мұғалімі Роза 7-сынып оқушыларымен «Химиялық элементтер» тақырыбында ашық сабақ өтті. Сабақтың көтерген мақсаты, оқушылардың әрбір элементтің химиялық таңбамен белгіленетінін білу және элементтерді металдар мен бейметалдарға жіктеу. Ал 7 «а»-сыныбында ағылшын тілі пәнінің мұғалімі Аяулым Нұрақтың да ашық сабағы өз мақсатына жетті. Оның «Holidays and Travel» атты тақырыбы оқушыларды бірден баурап әкетті.
Мектепте ұйымдастырылған пән мұғалімдерінің ашық сабақтары басшылық тарапынан жоғары бағаланды.
