Отырар аудандық білім бөлімінің ұйымдастыруымен жаратылыстану пән мұғалімдерінің аудандық семинары өтті. Аудандық білім бөлімінің әдіскері З.Жақыпбекованың айтуынша, аудандып жаратылыстану пән мұғалімдерінің семинары М.Шаханов атындағы жалпы білім беретін мектеп базасында «Рухани құндылықтарды дамытуда жаратылыстану пәндерін интеграциялаудың тиімділігі» атты тақырыбы аясында ұйымдастырылыпты.
- Мемлекет басшысы Қасым-Жомарт Тоқаев Жолдауларында білім саласын назарынан ешқашан тыс қалдырған емес. Жылсанап жалақыларының артуына, педагог мәртебесінің көтерілуіне көңіл бөліп келеді. Мұғалімдерден баланың сапалы білім, саналы тәрбие алуы үшін барлық қолдауды көрсетуде. Мектептердің материалдық базасын жақсарту және үш ауысымды мектептерді жою мақсатында «Жайлы мектеп» жобасы қабылданып іске асырылуда. Мекептер жаңа заманауи оқу құрал-жабдықтарымен жабдықталуда. Осының барлығы аудандағы мектептерде білім сапасының артуына өз септігін тигізуде. Осы ретте жаратылыстану пән мұғалімдерінің аудандық семинарында біз мұғалімдердің кәсіби құзыреттілігін, педагогикалық шеберліктерін, пәнаралық байланыстарын арттыру, жаңашыл ұстаздардың тәжірибесін дамыту, әдіс-тәжірибе алмасу жұмыстарын жетілдіруді мақсат етіп алдымызға қойдық, - дейді ол.
Семинар жоспарына сәйкес, П.Айтменов, Т.Ибрагимов, Абай, М.Шаханов атындағы мектептерінің физика пәнінің мұғалімдері Б.Абсалиева, Р.Саттарқұл, Ө.Мамырайымова және география пәнінің мұғалімдері Р.Ибрагимова, К.Култаева мен Б. Нысанбаева жаңа әдістермен сабақ өткізді. Мектеп директорының бейінді орынбасары Д.Оспанов пен мінезгер Ж.Биімбетов ұстаздармен тренинг сабағында топтық жұмыс жүргізді. Сабақ барысында ұстаздар өзінің шеберлігін, ізденімпаздығын, жаңашылдығын көрсете білді.
Сабақ оқушылардың интеллектуалды өмірінде құр ғана сабақ болып қоймас үшін, ол қызықты болу керек. Сол себептен ұстаздар «Learning», «Kahооt», «Wordwall» платформасы арқылы оқушылардың қызығушылығын оята білді.
Әдіскерлер З.Жақыпбекова мен Ж.Қалманова кіріктірілген сабақтар бір-бірімен ұштасуын, ұстаздардың ізденісте болғанын, саминар мақсаты өз деңгейіне жеткендігін сөз етті. Ұжымға алғысын білдіріп, шығармашылық табыс тіледі.
