Қазақстан Республикасы Президенті Қасым-Жомарт Тоқаев «Әділетті мемлекет. Біртұтас ұлт. Берекелі қоғам» атты Қазақстан халқына Жолдауында:
- Биыл біз жаңа кезеңге қадам бастық. Халқымыз жалпыұлттық референдумда саяси жаңғыру бағдарын қолдады. Конституциялық реформа Жаңа, Әділетті Қазақстанды құру жолындағы аса маңызды қадам болды. Еліміздегі саяси жаңғыру енді экономикалық өзгерістерге ұласуға тиіс.
Біз «Азамат – бизнес – мемлекет» арасындағы қатынасты түбегейлі өзгертеміз. Мемлекет, ең алдымен, бәріне бірдей мүмкіндік беріп, әділдік орнатады. Қоғам игілігіне арналған қызмет деңгейі жоғары болуына кепілдік береді. Әлеуметтік жағынан әлсіз топтағы азаматтарға қолдау көрсетеміз. Мүмкіндігі шектеулі жандарға да көмектесеміз. Президент жанындағы Омбудсмен тағайындалады.
Мемлекет экономикалық еркіндікті қолдайды. Бірақ, халықты нарық тұрақсыздығының ықпалынан барынша қорғайды. Шағын және орта бизнесті мейлінше дамытады,-деп атап өтті.
Жуырда Президент Жолдауын іске асыру аясында білім, денсаулық сақтау және еңбек cалаларының дамуы мәселелері бойынша Парламенті Сенаты депутаттарының Түркістан облысы мәслихат депутаттарымен кездесу болып өтті. Бұл туралы Түркістан қалалық мәслихатының баспасөз қызметі хабарлады.
Түркістан қаласы облыс орталығы болғалы 4 жыл ішінде көптеген жұмыстар атқарылды. Президент тапсырмасы бойынша қаламызды жан-жақты қарқынды дамыту бағытында көптеген жұмыстар атқарылуда. Халықаралық деңгейде туризмді дамыту, түркі елдері арасында рухани-мәдени шаралар, сонымен қатар, балаларымызға сапалы білім беру, олардың денсаулығын жақсартуда, облыс халқын жұмыспен қамту бағыттарында кешенді шаралар қабылданып, жұмыстар жүргізілуде.
Түркістан облысы және Түркістан қаласы мәслихаттарының депутаттарымен кездесуде өңірдегі жүргізіліп жатқан жұмыстар туралы жан-жақты талқылап өз пікірлерімен бөлісу үшін Түркістан облысы әкімдігінің, Түркістан облысы адами әлеуетті дамыту, қоғамдық денсаулық, жұмыспен қамту және әлеуметтік бағдарламалар басқармаларының басшылығымен салалардағы проблемалық мәселелерді талқылады.
Жиын барысында Түркістан қаласы мәслихатының хатшысы Мақсат Асылбекұлы қаланың әлеуметтік экономикалық дамуы туралы баяндады. Түркістан қаласында өзекті мәселелердің бір қатарын тарқатып айтты. Атап өтетін болсақ:
- мектептерге қаржы бөлу мәселесі;
- коммуналдық жұмысшылардың жалақысының төмен болуына байланысты нормативтік актілерді өзгертуге;
- студенттерге жатақхана жетіспеу мәселесі;
- туристердің көптеп тарту мақсатында әуежай рейстерінің бағыттарын ұлғайту сынды біршама ұсыныстарын айтты. Жиын соңында шақырылған қонақтармен пікір алысып, өзара талқылау жүргізді. Көтерілген мәселелерді алдағы уақытта бірлесіп атқаруға уағдаласты.