Төле би ауданының негізгі даму бағытының бірі туризм саласы. Бұл бағытта бүгінгі таңда ауданда 76 нысан жұмыс істеуде. Атап айтсақ, шаңғы базасы, 4 емдік-сауықтыру орны, 71 демалыс аймағы, 64 саяжай бар. Демалыс орындарының ішінде балалар лагерінің орны бөлек. Себебі еліміздің болашағы балалардың жазғы демалыстарын қызықты, көңілді әрі тиімді өткізгені маңызды.
Сондай-ақ таза ауа, керемет табиғат та балалардың денсаулығына айтарлықтай оң әсерін тигізеді. Әне-міне дегенше оқу жылы да аяқталуға таяу қалды. Сондықтан Қасқасу ауылдық округіндегі «Көктөбе» жазғы сауықтыру лагері балаларды қабылдауға дайындық үстінде.
Мұнда патриоттық тәрбие мен салауатты өмір салтын насихаттау бағытында қызықты, танымдық шараларға басымдық беріледі.
Демалушы балалар 5 мезгіл тамақпен қамтылады. Ұсынылатын тағамдар санитарлық қауіпсіздік талаптарына сәйкес қатаң тексеріледі. 7-16 жас аралығындағы балалар мұнда тау бөктерін аралап, табиғатпен етене танысып, таза бассейнге шомыла алады. Сондай-ақ түрлі интеллектуалды, спорттық ойындар ойнап, білімін арттыра алады. Шығармашылықпен айналысып, театр, жайдарман секілді көңіл-көтерер концерттік бағдарламаларды тамашалауға мүмкіндік алады. Балалардың қауіпсіздігі 100 пайыз қорғалған және медициналық көмек те қарастырылған.
