Жоғары сыныпты жолдар - елдің әлауқаты мен табысының көрсеткіші болып табылады. Түркістан облысы аумағындағы автомобиль жолдарының жақсы және қанағатты жағдайдағы үлесі қазіргі таңда 79%-ды құрайды. Жыл соңына дейін бұл көрсеткішті 87%-ға жеткізу көзделуде. Жоспар бойынша жол жөндеу жұмыстары кезең-кезеңімен жүргізіліп, 2025 жылға дейін сапалы жол үлесі 99,5%-ға жететін болады. Бұл туралы брифингте облыстық жолаушылар көлігі және автомобиль жолдары басқармасының басшысы Ролан Ибрагимов мәлімдеді.
«Nur Otan» партиясының XVIII съезіндегі 2025 жылға дейін жергілікті жолдардың 95%-н ретке келтіру тапсырмасына сәйкес, Түркістан облысында 2021 жылы автомобиль жолдары саласын дамыту мақсатында құрылыс-жөндеу жұмыстарымен 1 664,7 шақырым жол мен көшелерді қамту жоспарланса, биыл 1 149,9 шақырымы пайдалануға беріледі.
«Облыстық маңызы бар автомобиль жолдарының бойында – 410 көпір орналасқан. Аталған көпірлердің 378-і жақсы және қанағатты жағдайда болса, 35 көпір (20 күрделі, 15 орташа) жөндеуді қажет етеді. Биыл олардың 3-н күрделі жөндеуден өткізуге қаржысы қаралып, 2 көпірдің жөндеу жұмыстары аяқталып, пайдалануға берілді. Ал 1 көпір қыркүйек айында пайдалануға беріледі. Күрделі жөндеуді қажет ететін қосымша 6 көпірдің ЖСҚ әзірлеуге қаржы қаралып, мемлекеттік сатып алу жұмыстары жүргізілуде», - деді Ролан Бекмағамбетұлы.
Әлем елдерінің жол сапасын анықтайтын рейтингте Қазақстан 141 елдің ішінен 93-орын алған. Рейтингте аталған аумақтың қаншалықты жүктемесі бар екеніне қарамастан, бүкіл ел территориясындағы жол сапасы бағаланған.
Рейтингте берілетін ең жоғарғы баға – 7.0. Ең төмені – 1.0. 2019 жылғы орташа көрсеткіш 4.07 болған. Ал жол сапасы бойынша көш бастап тұрған үздік үш ел – Сипгапур, Нидерланды және Швейцария.
