Сарыағаш АПБ-ға кәсіпкер, яғни жергілікті тұрғын хабарласып арызданған. Оның айтуынша түнгі уақытта белгісіз біреулер құны 330 000 теңге болатын су бұрғылау құрылғысын жымқырып кеткен.
Аталған жайтты полиция қызметкерлері ҚР Қылмыстық кодексінің 188-бабы «Ұрлық» боынша тіркеп, шұғыл оқиға орнына жетті. Сондай-ақ полицейлер ұрлықтың қалай болғанын анықтады. Тексеру жұмыстарының нәтижесінде білікті полицейлер 1 апта ішінде 3 бірдей күдіктіні ұстады. Тәртіп сақшылары күдікті деп танылған орта жастағы 3-еуді полиция бөліміне жеткізді.
Белгілі болғандай күдікті 3 азамат жәбірленушінің үйінде құрылыс жұмыстары жүргізіліп жатқанын көріп, сырттай бақылап жүрген. Осылайша күдіктілер оңтайлы сәтті күтіп, өз арам ойларын жүзеге асырған. Бүгінде ұрланған құрал толықтай заңды иесіне қайтарылды. Қазіргі таңда күдіктілерге қатысты сотқа дейінгі тергеу жұмыстары жалғасуда.
Өз кезегінде Түркістан облысы полиция қызметкерлері азаматтарға қырағы болуды ескертеді. Егер сіз бөтеннің мүлкін ұрлаудың құрбаны немесе куәгері болсаңыз, тез арада полицияның «102» нөміріне хабарласыңыз.
ТО ПД-нің баспасөз қызметі
