Мақтаарал АПБ-ның бастығы полиция полковнигі Әділбек Сапарбеков пен жеке құрам қызметкерлері ҚР ІІО-да өз қызметін абыроймен атқарған полиция майоры Сапарбай Жамалдиновты құрметті зейнеткерлік демалысқа шығарып салды. Бөлімде арнайы шара ұйымдастырылып, ардагерге сый-сияпаттар табысталды.
Сапарбай Жамалдинов алғашқы еңбек жолын 1995 жылы Арыс қалалық полиция бөлімінде тергеуші болып бастаған. Ол өз қызметінде талай атышулы істерді абыроймен, кәсіби шеберлікпен ашып, басшылық тарапынан марапат-мадақтарға ие болған. Өзінің кәсібилігімен қызметке жаңадан орналасқан жас мамандарға үлгілі ұстаз бола білді. Әрдайым қызметте қажетті ақыл-кеңестерімен бөлісіп, әріптестерінің шыңдалуларына септігін тигізді.
Абыроймен құрметті демалысқа шыққан қызметкерге Мақтаарал АПБ-ның бастығы полиция полковнигі Әділбек Сапарбеков: «Ардагерін қазынасына теңеген қазақ әрқашан үлкенге қарап бой түзеп, алдыңғы буынға ілтипат көрсетіп жүреді. Үлкенін құрметтеген елдің еңсесі биік, керегесі кең. Сондықтан Мақтаарал АПБ-да жыл сайын құрметті демалысқа шыққан қызметкерлерге сый-құрмет көрсетіліп, зейнеткерлікке шығарып салу дәстүрі тұрақты түрде ұйымдастырылып келеді. Осы тұрғыда ҚР Ішкі істер қатарында қызмет атқарып, зейнеткерлікке шыққан Сапарбай Жамалдиновқа демалысыңыздың әр күні шалқыған шаттыққа, ұл-қыздардың ортасында балқыған бақытқа толып, бақытты ғұмыр кешіңіз деп тілейміз», - деп өзінің жүрек жарды лебізін жеткізді.
Сондай-ақ карантин режимін қатаң сақтай отырып, Атакент кентінде орналасқан спорт алаңдарының бірінде жеке құрам арасында кіші фудбол түрі өткізіліп, жеңімпаз командалар марапатталды.
ТО ПД-нің баспасөз қызметі
