Түркістан облыстық мәслихатының депутаты Үмбет Жүсіпбаев екі колледжді кәсіпкер Болатбек Әлиевтен жеке сенімгерлік басқаруға беру дұрыс емес деп санайды. Бұл туралы пікірін ол облыстық мәслихаттың аумақтардың дамуы және табиғат пайдалану жөніндегі тұрақты комиссиясының отырысында айтты, деп RGMEDIA.KZ ақпараттық агенттігінің Түркістандағы тілшісі.
– Облыс әкімінің орынбасары болған Бөкеңнің (Болатбек Әлиев – авт.) жұмыс істеу тәсілін білеміз ғой. Ондайларға бермеу керек. Не керегі бар, белден баса беретін болса?! Қайтып алып қою керек. Неге береміз? – деді Үмбет Жүсіпбаев.
Түркістан облысының Адами әлеуетті дамыту басқармасы кәсіпкер Болатбек Әлиевке Түркістан жоғары аграрлық колледжі мен Түркістан индустриалды-құрылыс колледжін жеке сенімгерлік басқаруға берген болатын. Бұған дейін бұл білім беру мекемелері облыстың алдыңғы қатарлы арнаулы орта оқу оорындары қатарына жатқызылып келген еді. Бірақ, Болатбек Нәжмединұлы олай ойламайды. Ол өз ойын таяуда ғана фейсбук парақшасында жазып, өзі басқаруға алған колледждерде оқыту жүйесінің мүлдем сын көтермейтінін жеткізді. Адами әлеуетті дамыту басқармасының басшысы Рақымбек Жолаевтың айтуынша, кәсіпкер колледж басшыларын жұмыстан босатып, олардың орнына білім беру саласында істемеген азаматтарды тағайындаған.