Депутаттар - халық қалаулылары. Яғни халық арасынан шығып депутат болып сайланды. Олардың мәжіліс, мәслихатқа барғандағы басты мақсаты - халықтың мәселесін заң шеңберінде шешіп, өңірлерде өмір сүру сапасын арттыру. Осыған байланысты депуттар әрқашан ел аралап, халықтың мұқ-мұқтажын өз көзімен көріп, мәселенің оң шешілуіне ықпал етуде.
Жақында Сайрам аудандық мәслихат депутаттары Қуатбеков Қадырбек Садықұлы және Жамалбеков Байсеит Жолдасбекұлы « Қарасу» БПҰ қабылдау бөлмесінде кезекті көшпелі қоғамдық қабылдау өткізіп, тұрғындардың талап–тілектерін тыңдады.
Ақбастау ауылы, А.Байтұрсынов көшесінің тұрғыны Батаева Карима Кайшибаевна №33 М.Шойынбаев мектебінен А.Байтұрсынов көшесіне дейін жарықтандыру жұмыстарын жүргізу бойынша көмек сұрап келді. Аталған мәселе бойынша алдағы уақытта сметалық құжаттары әзірленіп, Қарасу ауыл әкімшілігі тарапынан бюджеттен қаржы қарастыру бойынша ұсыныс енгізілетін болады. Ал Ақбастау ауылындағы ипотекалық үйлер орналасқан аумақтағы ауыз су мәселесін көтерген Кенбаева Гулзухраның өтініші бойынша «Сайрам Тазалық» мекемесінің қызметкерлерімен тиісті жұмыстар жүргізіліп, ауыз су мәселесі бүгінгі таңда шешімін тапты.
Қоғамдық қабылдаулар кестеге сәйкес үзіліссіз өткізіліп келеді. Өңірдегі өзекті мәселелер, тұрғындардың ұсыныс-тілектері партиялық бақылауда болады.
