Биыл жыл ауыр басталды. Көктемдегі жауын-шашынның дұрыс болмауынан шөп көтерілмей, шаруалар қиындыққа кезікті. Әсіресе мал шаруашылығымен айналысатындар төрт түліктеріне азық тауып бере алмай бастары қатты. Кей облыстарда мал арып-ашып, қырылды. Осы мәселені шешу мақсатында республиканың түкпір-түкпірінде түрлі шаралар қолға алына бастады. Осыған байланысты Түркістан облысын мал азығымен қамтамасыз ету және астық ору науқаны бойынша Қазығұрт ауданында өңір басшысы Өмірзақ Шөкеевтің қатысуымен семинар-кеңес өтті. Оған облыс көлеміндегі барлық аудан қала әкімдері мен ауыл шаруашылығы бөлімінің басшылары қатысты. Ал жиында сөз алған Өмірзақ Естайұлы биылғы қуаңшылық кезеңінде Бәйдібек ауданы өздеріне қажетті жем-шөп мөлшерін 90 пайызға жуық орындап отырса керісінше кей аудандар 20 пайыз ғана жинап үлгергендігін жеткізді. Сондықтан осы мәселені талдай отырып шешу бағыты талқыланды. Бұл тұрғыда баяндама жасаған Түркістан облыстық ауыл шаруашылығы басқармасының басшысы Нұрбек Бадырақовтың айтуынша өңірдің жалпы жем-шөп қажеттілігі 3 млн 900 мың тоннаны құрайды. Бүгінгі таңда сол меженің 40 пайызы жиналып үлгерген.
Сайрам ауданы Түлкібас, Төлеби секілді таулы аудандарға жақын орналасқандықтан, ауыл тұрғындары шөптен аса тапшылық көріп жатқан жоқ. Аудан шаруалары қысқы мал азықтарын сайлап, өзге өңірлерге көмек көрсетуге дайын. Сонымен қатар Сайрам ауданы шөптен бөлек, түрлі дақылдарды да өсіріп жинауда. Сайрам ауданы бойынша 2021 жылдың өнімі үшін күздік бидай - 17015 га, арпа 4000 га егілген, оның ішінде 2345 га суармалы жерден шаруалар егін жинау жұмыстарын бастады. Бүгінгі күнге Қарабұлақ ауыл округінде орналасқан «Рабочий -1» өндірістік кооперативі 40 гектар суармалы жерден әр гектарынан 23 ц/га астық орып, 92 тн өнім алуда.