Атырау облысының Қызылқоға ауданында ерлі-зайыптының өлімі мен отбасының тағы екі мүшесінің жоғалуына байланысты қозғалған қылмыстық іс бойынша тергеу жалғасып жатыр. Тергеу барысында күдікті ретінде марқұмдардың күйеу баласының әрекеті тексерілуде.
Алдын ала мәліметке сәйкес, ерлі-зайыптылардың мәйіттері шаруашылық құрылыстың ішінен табылған. Тергеу қасақана кісі өлтіру нұсқасын қарастырып, күдіктінің жалғыз әрекет еткен-етпегенін анықтауда. Қазіргі уақытта сот-медициналық сараптама тағайындалып, өлімнің нақты себебі, қылмыс уақыты мен қолданылған құрал анықталып жатыр.
Іс бойынша негізгі фигурант ретінде 29 жастағы күйеу бала Сұлтан Сәрсемалиев аталады. Оның туыстары тергелгенімен, күдіктінің өзі мен жұбайының, сондай-ақ марқұмдардың үлкен қызының қайда екені әзірге белгісіз. Аталған адамдар із-түзсіз жоғалғандар қатарында.
Құқық қорғау органдарындағы дереккөздердің айтуынша, бұл отбасы тұйық өмір салтын ұстанған. Ерлі-зайыптылар ресми түрде жұмыс істемеген, ал көпбалалы ана сыртқы ортамен байланысқа шықпаған. Бұл жайттар тергеу барысында қосымша зерттеліп жатыр.
Күдіктінің анасы ұлының кейде байланысқа шығатынын, алайда қоңырауларға жауап бермейтінін айтқан. Сонымен қатар бейресми дереккөздер мен әлеуметтік желілерде тараған мәліметтерге сәйкес, Сәрсемалиевтің Индонезия аумағында, оның ішінде Бали аралында болуы мүмкін екені болжануда. Сондай-ақ жоғалған әйелдердің бірінің банк картасын пайдаланғаны жөнінде ақпарат тараған.
Марқұм Максот Қарабалиннің әпкесі Асили Мухангалиева күйеу баланың ұзақ уақыт бойы жұбайының қайда екенін жасырып келгенін мәлімдеді. Оның айтуынша, әйелдер қараша айынан бері хабар-ошарсыз кеткен.
Құқық қорғау органдары күдіктінің елден тыс жерде болуы мүмкін деген нұсқаны да жоққа шығармайды. Қазіргі уақытта жедел-іздестіру және тергеу амалдары жалғасуда. Іс бойынша ресми ақпарат шектеулі.