Бүгін Сайрам ауданындағы №20 С.Сейфуллин атындағы мектеп-гимназиясында «Ауыл» партиясының бастамасымен “Кітап – руханият өзегі” акциясы аясында мазмұнды іс-шара өтті. Аталған шара барысында партияның Сайрам ауданы бойынша аумақтық ұйымының төрағасы Жайлаубеков Есіркеп Оразбекұлы білім ордасына 140 түрлі жанрдағы кітаптарды табыстады.
Бұл игі бастама – оқушылардың кітап оқуға деген қызығушылығын арттырып, олардың рухани және зияткерлік дамуына серпін беретін маңызды қадам. Түрлі жанрдағы әдебиеттер мектеп кітапханасының қорын толықтырып, жас ұрпақтың білім көкжиегін кеңейтуге мүмкіндік береді.
Іс-шара барысында мектеп ұжымы көрсетілген қолдау үшін алғыстарын білдіріп, мұндай игі бастамалардың алдағы уақытта да жалғасатынына сенім білдірді. «Ауыл» партиясы білім мен руханиятты дамыту бағытындағы жұмыстарын жүйелі түрде жалғастыра бермек.