Жамбыл облысының әкімі Бердікбек Сапарбаев 10 жылдан бері қосалқы шаруашылыққа жер телімдерін бөлу мәселесін шеше алмай отырғанды тексеруді тапсырды. Бұл туралы ол Жуалы ауданына барған сапарында айтты деп хабарлайды RGMEDIA.KZ ақпарат агенттігі.
Ақтөбе ауылдық округінің Бәйтерек ауылында Мәдениет үйінде жергілікті жұртпен жүздескен Бердібек Сапарбаев облыс тұрғындарының тұрмыстық табысын жақсарту жобасы бойынша тиісті қаражаттың толық игерілмегендігіне, ауылдағы емдеу мекемесі мен әкімдіктің бір ғимаратта орналасқандығына көңіл бөлді. Жергілікті кәсіпкерлерді тарта отырып, мемлекеттік-жекеменшік әріптестік аясында жаңа амбулатория салу керектігін айтып, ол бойынша жауапты тұлғаларға тиісті жұмыстар жүргізуді тапсырды.
Бәйтеректіктер жергілікті әкімдік қосалқы шаруашылыққа жер телімдерін бөлу мәселесін 10 жылдан астам уақыт бойы шеше алмай отырғандығын айтып шағымданды. Б.Сапарбаев бұл мәселе бойынша жауапты тұлғаларға тез арада тексеріс жүргізуді және оның қорытындысы бойынша өзіне баяндауды ескертті.