Қазақстандықтар биыл картоп тапшылығын көре ме? Бұл сауалға Ауыл шаруашылығы министрі Айдарбек Сапаров Үкімет отырысынан соң өткен брифингте жауап берді деп хабарлайды RGmedia.kz тілшісі.
Министрдің айтуынша, биыл елімізде картоп тапшылығы болмайды. Ол сондай-ақ былтырғы жылы картоптың не себепті қымбаттағанын түсіндірді.
"Жалпы былтыр картоптың шығымы жақсы болды. 600 мың тоннаға жуығы экспортталды. Ал импорт көлемі – небәрі 60 мың тонна, бұл экспорттың 10 пайызын ғана құрайды. Осы жағдайларды ескере отырып, биыл картоп егетін алқапты 9 мың гектарға ұлғайтып жатырмыз. Сондықтан былтырғыдай жағдай қайталанбайды деп ойлаймын", – деді министр.
Айдарбек Сапаров картопты сақтау мәселесіне де тоқталды.
"Қазір бізде картоп сақтау орындарын салу жүріп жатыр. Бұл бағытта арнайы индикаторлар мен жол картасы бар. “Солтүстік” жобасы аясында кәсіпкерлерге 2,5 пайыздық несиемен қойма салуға мүмкіндік берілген. Егер жеке кәсіпкер өнімін сақтай алмай жатса, бізге хабарласуына болады. Министрлік тарапынан қолдау көрсетеміз", – дейді ол.