Қазақстан – көпұлтты, бір шаңырақ астында түрлі этнос өкілдері бейбіт өмір сүріп жатқан ел. Осындай сан алуан мәдениеттердің өзара үндесуі еліміздің ерекше байлығы әрі рухани құндылықтардың қайнар көзі болып табылады.
Қазақстан халқы Ассамблеясы аясында құрылған этномәдени бірлестіктердің қазақ ұлтының рухани құндылықтарын сақтау мен дәріптеудегі рөлі зор. Олар ортақ құндылықтарды насихаттау арқылы бірлік пен келісімнің үлгісін көрсетіп келеді.
Ахысқа түріктері: тарихи тағдыр және 80 жылдық бірлік
Жақында Шымкенттегі «Достық үйінде» Ахысқа түріктерінің Қазақстанға қоныстануының 80 жылдығына арналған салтанатты іс-шара өтті. Бұл маңызды шара еліміздегі этносаралық келісім мен бейбітшілікті нығайтуға бағытталған шаралардың біріне айналды.
Іс-шара «Қазақ еліне мың алғыс» монументіне гүл шоқтарын қою рәсімімен басталды. Бұл рәсім ахысқа түріктерінің қазақ халқына деген алғысы мен ризашылығын білдіретін ерекше қадам болды.
Іс-шараға Қазақстан халқы Ассамблеясы Төрағасының орынбасары – ҚР Президенті Әкімшілігі Қазақстан халқы Ассамблеясы Хатшылығының меңгерушісі Марат Әзілханов, Шымкент қаласы әкімінің орынбасары Сәрсен Құранбек, Дүниежүзілік ахысқа түріктері Одағының президенті Зиятдин Касанов, Түркия Республикасының Алматы қаласындағы Бас консулы Мудеррисоглы Эврен, «Шымкент қалалық «Ахысқа» түрік этномәдени орталығы» қоғамдық бірлестігінің төрағасы Латипша Асанов және басқа да құрметті қонақтар қатысты.
Шара барысында қонақтар ахысқа түріктерінің Қазақстандағы тарихын баяндайтын ақпараттық стендтер мен қолданбалы өнер көрмесін тамашалады. Көрмеде ахысқа түріктерінің ұлттық өнері, мәдениеті және тарихына арналған экспонаттар қойылды.
Ресми бөлім Қазақстан Республикасының Мемлекеттік Әнұранымен ашылып, ахысқа түріктерінің Қазақстанға қоныстануының 80 жылдығына арналған бейнеролик ұсынылды. Бұл бейнеролик олардың қиын-қыстау кезеңдерде қазақ халқынан көрген қамқорлығы мен ынтымақтастықтың ерекше мысалдарын көрсетті.
Құрметті қонақтар өз сөздерінде Қазақстан халқының бауырмалдылығы мен достық қарым-қатынасын атап өтіп, ахысқа түріктерінің еліміздің дамуына қосқан үлесіне жоғары баға берді.
-Ахысқа түріктерінің Қазақстанға қоныстанғанына биыл 80 жыл толып отыр. Бұл - тарихымыздағы қиын-қыстау кезеңдерде қазақ халқының дархандығы мен бауырмалдығын айшықтайтын айтулы дата. Өзге елден мәжбүрлі түрде қоныс аударған кезде қазақ халқы Ахысқа түріктерін құшақ жая қарсы алып, өз шаңырағымен, нанымен бөлісті. Бұл кеңпейілділіктің, бірлік пен ынтымақтастықтың айқын көрінісі, - деді Марат Әзілханов өз сөзінде.
Сонымен қатар, шара барысында қоғамда белсенді қызмет атқарып жүрген бірқатар азаматтар арнайы марапаттарға ие болды.
Іс-шара мерекелік концертпен жалғасын тапты. Онда Ахысқа түріктерінің ұлттық әндері мен билері орындалды.
Айта кетейік, Шымкент қаласында бүгінде 7 мыңға жуық Ахысқа түрік этносының өкілдері тұрады. Қалалық Қазақстан халқы Ассамблеясының құрамында жұмыс істейтін «Шымкент қалалық «Ахысқа» түрік этномәдени орталығы» қоғамдық бірлестігі қоғамдық келісім мен бірлікке негізделген түрлі бастамаларды жүзеге асырып келеді. Бұл орталықтың бастамалары этносаралық келісімді нығайтуға, ұлттық мәдениетті сақтауға және жас ұрпаққа бейбітшілік пен ынтымақтастық құндылықтарын дәріптеуге бағытталған.
Бүгінде Ахысқа түріктері еліміздің дамуына өз үлестерін қосып, әр салада табысты еңбек етуде. Олар өздерінің мәдениеті мен дәстүрін сақтап қана қоймай, көпұлтты мемлекетіміздегі қоғамдық келісім мен бірлікті нығайтуда маңызды істер атқарып келеді.
Ахысқа түріктерінің Қазақстанға қоныстануы – бауырмалдықтың, төзімділік пен достықтың айқын көрінісі. 80 жылдық мерейтой осы құндылықтардың мәңгілік екендігін тағы да дәлелдеді.
Этномәдени бірлестіктер қазақ халқының тілін, салт-дәстүрлерін құрметтеп қана қоймай, оларды ұлықтауға белсенді түрде қатысады. Олар қазақ тілін үйрену курстарын ұйымдастырып, өз өкілдерін мемлекеттік тілді меңгеруге ынталандырады. Осындай бастамалардың арқасында әр этнос қазақ халқының бай мәдени мұрасымен танысып, тілді үйрену арқылы қазақ қоғамымен тығыз байланыс орнатуда.
Мысалы, еліміздегі корей, неміс, ұйғыр, татар және басқа да этнос өкілдері қазақтың ұлттық мерекелерін тойлауға белсенді қатысады. Наурыз мейрамында олар өз дәстүрлерін қазақтың қонақжайлылығымен үйлестіріп, ортақ тойдың сәнін келтіреді. Бұл мерекелік шаралар тек қазақ халқының емес, Қазақстанда тұрып жатқан барлық этностардың бірлігі мен өзара түсіністігін нығайтуға ықпал етеді.
Қазақтың рухани құндылықтарын насихаттау – этномәдени бірлестіктер қызметінің маңызды бағыты. Олар қазақ халқының эпостық жырларын, ән-күйлерін, айтыс өнерін дәріптеп, бұл мұраны жас ұрпаққа жеткізуге атсалысады. Көптеген бірлестіктер қазақтың ұлттық өнері мен әдебиетін зерттеп, бұл мұраны өз этностық қауымдастықтарына таныстыруда.
Мәселен, орыс этномәдени орталығы қазақ жазушыларының шығармаларын аударып, олардың идеяларын кеңінен насихаттайды. Өзбек этномәдени бірлестіктері қазақтың ұлттық тағамдары мен қолөнер бұйымдарын жасауды үйреніп, ортақ мәдени байлыққа үлес қосып жүр. Бұл бағыттағы жұмыстар тек қазақ халқының ғана емес, барлық этностардың мәдениеті мен руханиятын байыта түсуде.
Қазақ халқының құндылықтарын дәріптеудегі ең маңызды қызметтерінің бірі – ұрпақ тәрбиесі. Бірлестіктер қазақтың ата-ананы құрметтеу, үлкенге ізет көрсету, кішіге қамқор болу сияқты қасиеттерін өздерінің тәлімдік бағдарламаларына енгізген. Балалар мен жастарды қазақтың салт-дәстүрлері арқылы тәрбиелеу, ұлттық өнерге баулу – этномәдени бірлестіктердің басты міндеттерінің бірі.
Көптеген бірлестіктер қазақтың ұлттық ойындары, қолөнері және дәстүрлі музыкасын үйрететін үйірмелер ашқан. Бұл жас буынның тек қазақ халқының ғана емес, жалпыадамзаттық құндылықтарға жақындауына ықпал етеді.
Осындай бір туғандай болып кеткен этнос өкілдері қазақ халқының рухани мұрасын насихаттап қана қоймай, ұлттар арасындағы достықты нығайтуға үлкен үлестерін қосып жүр. Олар қазақтың қонақжайлылығы мен кеңпейілділігін үлгі тұтып, өзара сыйластық пен бейбітшілік мәдениетін қалыптастыруда. Қоғамдық келісімнің арқасында Қазақстан халқының біртұтастығы сақталып, ортақ мақсаттарға жетуге ұмтылыс арта түсуде.
Этномәдени бірлестіктер – қазақ халқының рухани құндылықтарын сақтау мен насихаттаудың маңызды тетігі. Олар елдегі әр этнос өкілдерін бір шаңырақ астына біріктіріп, ортақ құндылықтарды дәріптеу арқылы ұлттар арасындағы бірлік пен келісімді нығайтады. Бұл бірлестіктердің жұмысы қазақ халқының мәдениеті мен руханиятының өзге этностар арасында да жоғары бағаланып, ел ішіндегі татулық пен достықтың үлгісіне айналып отыр. Ұлтымыздың рухани байлығын дәріптеген әрбір іс-шара Қазақстанның бейбітшілік пен бірлік жолындағы жарқын келешегіне сенімді нығайта түседі.
