Еңбек адамына құрмет көрсету төңірегінде Президент өзінің халыққа арнаған Жолдауында ерекше атап өткен болатын.
«Елімізде еңбекқор адам, кәсіби маман ең сыйлы адам болуға тиіс. Осындай азаматтар мемлекетімізді дамытады. Мен Ұлттық құрылтайда және «Жастар рухының» съезінде бұған арнайы тоқталдым. Біз қарапайым еңбек адамына құрмет көрсетуіміз керек. Қандай кәсіппен айналыссаң да, оны сапалы атқару маңызды. Жастар нақты бір мамандықтың қыр-сырын жетік білуге ұмтылғаны жөн. Өз саласының шеберіне әрдайым сұраныс болады. Өскелең ұрпақ Қазақстанда ғана емес, өзге елдерде бәсекеге қабілетті болуы керек. Көрші мемлекеттің азаматтары шетелге барып, жұмыс талғамай еңбек етіп жатыр. Олар біздің елде де өте жақсы табыс тауып жүр. Дәл осындай жандардан үлгі алу керек. Шын мәнінде, ең бастысы – адал еңбек. Біз мұны жете түсінетін ұрпақ тәрбиелеуге тиіспіз. Идеология жұмысында осыған баса мән берген жөн», – деді Қасым-Жомарт Тоқаев былтыр халыққа арнаған Жолдауында.
Еңбек адамын насихаттау мақсатында жуырда Шымкент қаласы Еңбекші ауданының жастары ауған соғысы ардагері, ардагерлер ұйымының мүшесі Меңдібаев Сүндет Үсенбайұлымен кездесті.
Мақсаты – өскелең ұрпақтың бойына отансүйгіштік, патриоттық сезімдерді қалыптастырып, батырлық қасиеттерді сіңіру, сұрапыл жылдарда от кешкен майдангер батырлардың ерлік жолын насихаттау.
Кездесуде майдангер соғыс кезіндегі қиыншылықтары мен басынан өткен оқиғаларымен бөлісіп, сұрапыл сұм соғыстың залалдарын атап, ешқандай елде соғыстың болмауын тіледі.
Кездесу соңында жастар өздерін қызықтырған сұрақтарын қойып, естелік ретінде суретке түсті.