Шымкенттегі өзекті саланың бірі - қоғамдық көлік саласын цифрландыру. Аталған бағыт бойынша қалада қарқынды жұмыстар атқарылуда. Мысалы, биыл және келесі жылдары Шымкенттегі автобустарда электронды билет беру жүйесі енгізілмек. Алдымен биыл қаладағы отыз автобусты қамтитын бағыттардың бірінде электронды билет бету жүйесін пилоттық режимде ендіру жоспарлануда. Бұл туралы шаһар басшысы ҚР Премьер-Министрі Бақытжан Сағынтаевтың төрағалығымен өткен Үкімет отырысында мәлім етті. Әкімнің айтуынша «Қауіпсіз қала» жобасы аясында қаладағы бейнекамералар саны 479-ға дейін, интеллектуалды қиылыстар саны жиырма бірге дейін көбейтілген. Сараптама жұмыстары соның нәтижесінде көшелердегі қылмыс саны өткен жылмен салыстырғанда 16,7%-ға азайғанын көрсетті. Бұған қоса қазіргі таңда нейрондық жүйелер мен жасанды интеллект технологияларын қолдана отырып бірыңғай бейне-бақылау жүйесін құру мақсатында әлеуеттік жеткізушілермен келіссөздер жүруде. Оқу жылы басталғанша қаладағы отыз криминогенді учаскені қамтитын «Сергек» жүйесін ендіру бойынша пилоттық жобаны жүзеге асыру жоспарланып отыр.