Қазіргі күрделі геосаяси жағдайда ұлттық бірлік пен ішкі тұрақтылықтың маңызы бұрынғыдан да артып отыр. Қазақстан үшін бұл – тек идеологиялық ұран емес, мемлекеттіліктің негізгі тірегі.
Қоғамдық келісім – кез келген мемлекеттің ең басты тірегі. Бейбіт өмірсіз, бірліксіз ешбір елдің дамуы мүмкін емес. Тарихқа көз жүгіртсек, ішкі қақтығыстар мен алауыздықтың кесірінен өркениеттен кенде қалған, тіпті картаның бетінен жоғалып кеткен мемлекеттер аз емес. Ал бірлігі бекем елдер әрқашан да кез келген дағдарысты еңсеріп, жаңа белестерді бағындырған.
Қазақстан – көпұлтты, көптілді түрлі мәдениет өкілдері бейбіт қатар өмір сүріп отырған ел. Тәуелсіздік алған сәттен бастап еліміздің басты ұстанымы – халық бірлігін сақтау және нығайту болды. Мемлекет басшысы Қасым-Жомарт Тоқаевтың сөзінше «Татулық пен келісім – еліміздің ең басты байлығы». Бұл ұстаным уақыт сынынан өткен және қазіргі жаһандық сын-қатерлер жағдайында да өзектілігін арттыра түсуде.
Әлемдік тәжірибе көрсеткендей, тұрақтылық пен келісім бар елде ғана экономикалық өркендеу мүмкін болады. Инвестициялар тарту ірі жобаларды жүзеге асыру, жаңа технологияларды енгізу – мұның бәрі тек сенімді, қауіпсіз, татулығы берік ортада жүзеге асады. Қазақстанның соңғы онжылдықтағы экономикалық жетістіктері – бұл біздің ішкі тұрақтылықты сақтай білгеніміздің дәлелі.
Бірлік болмаған жерде қандай да бір табиғи байлық немесе заманауи технология елді дамытпайды. Қайта, алауыздықтың өзі бар мүмкіндікті жойып жібереді. Сондықтан ынтымақты сақтау – бұл тек әлеуметтік мәселе емес, стратегиялық дамудың негізгі тетігі.
Мәдениет, ғылым және білім – тек бейбіт ортада ғана дамиды. Қоғамда сенімсіздік пен дүрдараздық белең алса, шығармашылық та, инновация да тоқтайды. Ал бірлік пен өзара сыйластық бар елде әр азамат өзін қауіпсіз сезініп, өзінің әлеуетін толық аша алады.
Қазақстан халқы Ассамблеясы, этномәдени бірлестіктер, жастар ұйымдары – барлығы да қоғамдағы келісімді нығайтуға үлес қосуда. Бұл – тек мемлекеттің ғана емес, әр азаматтың жауапкершілігі.
Ынтымақ – жай ғана сөз емес. Ол – нақты әрекет, күнделікті қарым-қатынасымыздағы сыйластық, ортақ мүдде үшін жұмыла білу қабілеті. Болашақ ұрпақ бізден тек экономикалық жетістіктерді ғана емес, сондай-ақ, бірлікті сақтау дәстүрін де мұра етіп алуы тиіс.