Сыбайлас жемқорлықпен күрес – еліміздің саяси және әлеуметтік тұрақтылығының, экономикалық дамуының басты шарты. Мемлекет бұл бағытта жүйелі саясат жүргізіп келеді. Солардың бірі – 2022–2026 жылдарға арналған Сыбайлас жемқорлыққа қарсы саясат тұжырымдамасы, ол қоғамда әділдік пен ашықтық қағидаттарын нығайтуға бағытталған.
Аталған тұжырымдама Президент Қасым-Жомарт Тоқаевтың бастамасымен қабылданды және ол сыбайлас жемқорлықтың алдын алу, қоғамның санасын өзгерту, мемлекеттік аппараттың ашықтығын арттыру секілді маңызды бағыттарды қамтиды.
Тұжырымдама аясында төрт негізгі басымдық айқындалған:
1. Сыбайлас жемқорлық тәуекелдерін азайту және алдын алу шараларын күшейту;
2. Мемлекеттік қызмет пен квазимемлекеттік сектордың ашықтығын қамтамасыз ету;
3. Бизнес пен азаматтардың құқықтарын қорғау;
4. Қоғамда сыбайлас жемқорлыққа төзбеушілік мәдениетін қалыптастыру.
Қазіргі уақытта еліміздің барлық өңірлерінде, соның ішінде Шымкент қаласында, осы тұжырымдаманы жүзеге асыру мақсатында нақты іс-шаралар жоспары бекітілген. Мемлекеттік мекемелерде «Ашық әкімдік», «Адалдық алаңы» қағидалары енгізіліп, халықпен кері байланыс жүйесі жолға қойылды. Бұдан бөлек, цифрлық технологияларды енгізу арқылы мемлекеттік қызмет көрсету процестері автоматтандырылып, адам факторының ықпалы азайтылды. Электронды порталдар арқылы өтініш қабылдау, рұқсат беру және есеп тапсыру тәртібі жеңілдетілді.
Осы орайда, «AMANAT» партиясы Шымкент қалалық филиалының Сыбайлас жемқорлыққа қарсы іс-қимыл жөніндегі кеңесінің кезекті отырысы өтті.
Отырысты кеңес төрағасы Берген Ержаппар жүргізді. Іс-шараға Шымкент қаласының туризм, сыртқы және креативті индустрия басқармасының басшысы Бексұлтан Әділханов, Қаратау ауданы әкімінің орынбасары Досалы Амангелдиев, сондай-ақ кеңес мүшелері қатысты.
Күн тәртібінде:
• 2022–2026 жылдарға арналған Сыбайлас жемқорлыққа қарсы саясат тұжырымдамасын іске асыру;
• «Халықпен бірге!» сайлауалды бағдарламасы аясында атқарылып жатқан жұмыстар;
• Қаратау ауданында сыбайлас жемқорлықтың алдын алу және тұрғындарды қабылдау мәселелері қаралды.
Сыбайлас жемқорлыққа қарсы іс-қимыл агенттігі мен қоғамдық ұйымдар бірлесе отырып, білім беру мекемелерінде, жоғары оқу орындарында және еңбек ұжымдарында түсіндіру кездесулерін тұрақты түрде өткізіп келеді. Бұл шаралар азаматтардың құқықтық сауаттылығын арттырып, әділдік пен жауапкершілік құндылықтарын дәріптеуге бағытталған.
Сонымен қатар, тұжырымдаманы іске асыру барысында қоғамдық бақылау институттарының рөлі күшейтілді. Азаматтар мен үкіметтік емес ұйымдар түрлі комиссиялар мен кеңестер құрамына тартылып, шешім қабылдау процесіне қатысу мүмкіндігіне ие болды.
Жалпы, 2022–2026 жылдарға арналған Сыбайлас жемқорлыққа қарсы саясат тұжырымдамасы – мемлекеттік аппараттың ашықтығын қамтамасыз етудің және қоғам сенімін арттырудың нақты құралы. Бұл құжаттың табысты жүзеге асуы еліміздің әділетті және таза қоғам құру жолындағы маңызды қадамы болып табылады.
Шымкент – еліміздің ең ірі әрі қарқынды дамып келе жатқан мегаполисі. Соңғы жылдары қалада туризм мен креативті индустрияны дамыту бағытында маңызды бастамалар жүзеге асырылуда. Бұл салалар өңірдің экономикалық өсіміне ғана емес, оның мәдени келбеті мен халықаралық тартымдылығына да зор ықпал етуде.
Шымкент қаласы өзінің ежелгі тарихымен, ерекше табиғатымен және ұлттық дәстүрлерімен танымал. Қала аумағында тарихи және мәдени ескерткіштер, этноауылдар, демалыс аймақтары мен туристік нысандар көптеп шоғырланған. Соңғы жылдары туризм саласына жеке инвестициялар тартылып, жаңа қонақүйлер, демалыс орталықтары мен ойын-сауық кешендері бой көтерді.
Жиында күн тәртібіндегі мәселе бойынша баяндама жасаған Бексұлтан Әділханов туризм саласындағы көрсеткіштердің айтарлықтай өскенін атап өтті.
2025 жылдың алғашқы жартыжылдығында Шымкент қаласына келген туристер саны 242 909 адамды құрады. Оның ішінде 227 мыңнан астамы ішкі, ал 15,5 мыңға жуығы сыртқы туристер.
Саладағы қызмет көрсету көлемі 6,3 млрд теңгеден асты, бұл өткен жылдың сәйкес кезеңімен салыстырғанда 20%-ға өсім көрсетеді.
Биыл бірқатар маңызды жобалар іске асырылды:
- 7 туристік нысанға төлқұжат қойылды (Ибрагим ата, Қарашаш ана, Әбділ Әзіз баб және т.б.);
- Smart санитариялық тораптар мен 3 қонақ үй пайдалануға берілді;
- «Visit Shymkent» туристік порталы жаңартылып, 8 елге тікелей әуе рейстері ашылды;
- «Shymkent Creative Hub» орталығы ашылып, 80-нен астам іс-шара өткізілді;
- Франция, Қытай, Қырғызстан және Болгариямен халықаралық ынтымақтастық нығайтылды.
Сонымен қатар, туризмді дамыту бағытында этноауыл аумағын абаттандыру, гастроаллея құру және «Omir Shymkent» демалыс аймағын іске қосу жобалары жоспарланғанын жеткізді.
Креативті индустрия – қаланың жаңа экономикалық бағытына айналып келеді. Бұл салаға дизайн, медиа, киноөндіріс, анимация, сән, қолөнер, гастрономия және музыка индустриясы кіреді. Шымкентте жас шығармашыл тұлғаларды қолдау мақсатында «Shymkent Creative Hub» орталығы ашылып, түрлі жобалар жүзеге асырылуда. Қалалық әкімдік тарапынан туризм мен креативті индустрияны дамыту үшін инфрақұрылымдық және инвестициялық қолдау шаралары қабылдануда. Кәсіпкерлерге арналған жеңілдетілген несие, гранттық бағдарлама мен оқыту курстары жүргізіліп жатыр.
Шымкенттің туристік және креативтік әлеуеті зор. Алдағы жылдары бұл бағыттар бойынша жаңа жобалар іске асып, қала Орталық Азиядағы мәдени және туризм орталықтарының біріне айналмақ.