Мемлекет басшысы Қасым-Жомарт Тоқаев «Әділетті Қазақста: заң мен тәртіп, экономикалық өсім, қоғамдық оптимизм» атты Жолдауында ел азаматтарының қаржылық сауаттылығын арттыруды тапсырғаны белгілі.
«Цифрлық технологиялардың күнделікті өмірімізге жаппай енуі түрлі алаяқтардың көбеюіне әкеп соқтыруда. Оған бәріміз куә болып отырмыз. Сондықтан, қазір қаржы және экономика негіздерін білу, қарапайым цифрлық дағдыларды меңгеру аса маңызды болып тұр. Осы ретте Amanat партиясы ұсынған «Қарызсыз қоғам» жобасын атап өткім келеді. Азаматтардың қаржылық сауатын арттыруға арналған осы жобаға былтыр 65 мың адам қатысты. Ал, биыл одан да көп адам қатысады.
Мектептерде, жоғары оқу орындарында қаржылық және цифрлық сауаттылық негіздерін үйрететін білім бағдарламасын енгізу қажет. Бұл жұмысты Үкімет қаржы саласын реттеу органдарымен бірге атқаруы керек. Мұның бәрі азаматтарымыздың әртүрлі алаяқтардың құрығына түсіп қалмауына мүмкіндік береді», - деді Президент. Бүгінгі күні Мемлекет басшысының тапсырмасына сәйкес Түркістан қаласында халықтың қаржылық сауаттылығын арттыру мақсатында түсіндіру, ақпараттандыру жұмыстары қарқынды жүргізілуде.
«Қазір заң тетіктерін, нормаларын жете білмегендіктен көптеген азамат өз құқығын қорғауда, тіпті күнделікті тіршілікте дегендеріне жете алмай жүргені анық. Одан бөлек алаяқтарға жем болатыны және бар. Сондықтан құқықтық сауаттылық қазір әрбір азаматқа ауадай қажет», - дейді Түркістан қаласы полиция басқармасы бастығының бірінші орынбасары Алмас Мырзахметов.
Бұл – уақыт пен қоғам талап етіп отырған құндылық. Кез келген адам өзінің өміріне керекті құқығын және оның шегін барынша білгені абзал. Сол себепті ел болып құқықтық мемлекет құрамыз деген ұранмен алға ұмтылған кезеңде әрбір отандасымыздың құқықтық сауатын жетілдіруге талпынып, барынша осы бағыттағы біліммен «қарулануға» ұмтылуы тиіс.
Жалпы Ата заң талаптарының орындалуына, азаматтардың құқықтары мен бостандықтарына бірден-бір кепіл болатын тұлға ретінде Мемлекет басшысы да бұл іске мүдделілік танытады. Президент Қасым-Жомарт Тоқаев ел азаматтарының құқықтық санасын қалыптастыруды түрлі маңызды жиындарда сөйлеген сөздерінде, халыққа арнаған Жолдауларында да ұмыт қалдырған емес. Мәселен, Ұлттық құрылтайдың «Әділетті Қазақстан – адал азамат» атты екінші отырысында сөйлеген сөзінде: «Білікті заңгер Серік Ақылбай атап өткен құқықтық сананы қалыптастыру мәселесі де өте өзекті. Жастардың құқықтық сауатын арттыру аса маңызды. Сонда әркім өзінің құқығын қорғай біледі және өзгенің құқығын таптамайды. Заң мен тәртіп үстемдік құрған мемлекеттің тұғыры қашанда мықты болады», – деп, отандастарымызға құқықтық сананы қалыптастырудың аса маңызды екенін айтып өтті.
Бүгінде құқықтық сауаттылық пен мәдениет төңірегінде сөз қозғалса, ең алдымен, адам құқықтарын қорғау, нәсіліне, жынысына не басқа да ерекшеліктеріне қатысты кемсітуге болмайтыны туралы айтылады. Алайда құқықтық мәдениеттің аясы айтарлықтай кең. Құқықтық нигилизмнің өзі сыбайлас жемқорлықты тудырса, оның салдары «көлеңкелі» экономиканың өркен жаюына жол ашады. Осы кедергілердің кесірінен мемлекеттің қалыпты жұмыс істеуі тежеледі. Оған қоса азаматтардың заң нормалары мен өз құқықтарын жетік білмеуі мемлекет тағдырының өзгеруіне әкеп соғуы да мүмкін. Өйткені мұндай жағдайлар көбіне саяси ойындардың алғышарты болып кетуі ғажап емес.
Бұл тенденция бізде ғана емес, әлем елдерін де алаңдатқан өзекті мәселелердің қатарында. Сарапшылардың айтуынша, құқықтық сауаттылық проблемасы біздің елде де өзектілігін жоймай тұр. Құқықтық сауатсыздықтың салдары қандай мәселелер туғызуы мүмкін, құқықтық сауаттылық неліктен маңызды, мемлекеттік құрылым қандай іс-шараларға басымдық беруі керек, азаматтардың құқықтық сауаттылығын арттыру үшін қайтпек керек, нені өзгерту керек деген сауалдар төңірегінде заңгер мамандар аз айтып жүрген жоқ.
- Бүгінде мамандар халықтың сауаттылық деңгейінің төмендігін жиі айтып жүр. Әрине, мұндай қорытындымен келіспеске шара жоқ. Заң үстемдігі жөніндегі рейтинг бойынша Қазақстан посткеңестік елдерден алда келеді. Десе де жемқорлық, адам құқығын қорғау, ашық үкімет, заң үстемдігі секілді мәселелер әлі де күн тәртібінен түсер емес. Сол себепті осы саланың мамандары ел халқының құқықтық сауатының деңгейін арттырудың маңызы зор екенін алға тартады. Өйткені құқықтық сауаттылықтың төмендігі азамат үшін де, мемлекет үшін де қауіпті. Осы қаржылық сауаттылықтың төмендігінен алаяқтар ел тұрғындарын оңай алдап, қалталарын қағып отыр. Алаяқтың қулығына құрық бойламайды. Қалтасын қампайту үшін ол небір қитұрқы амалдарға барады. Мәселен, Түркістан қалалық полиция басқармасының қызметкерлері жақында алаяқтық қылмысын жасаған әйелді анықтады. Күдікке ілінген әйел екі бірдей танысына мамандықтары бойынша мектепке жұмысқа орналастырып беретінін айтып, сендірген. Ол жәбірленушілерден алдын ала қызметі үшін біреуінен 1 миллион теңге, екіншісінен 800 мың теңге көлемінде қаражат алған. Алайда біршама уақыт өтсе де уәдесін орындамай, не ақшаларын қайтармаған. Яғни әйел алған ақшаны бас пайдасына жаратқан. Қазіргі таңда оған қатысты сотқа дейінгі тергеу амалдары жүргізіліп, істің мән-жайы анықталуда.
Мұндай мысалды көптеп келтіруге болады. Түркістан полицейлері жуырда алаяқтық қылмысқа қатысы бар деген күдікпен 30 жастағы жігітті ұстады. Тексерген кезде арызданушылардың Инстаграмда жалған интернет-дүкен парақшасы арқылы алданғаны анықталды. Инстаграм желісінде күдікті жігіт үй жиһазын жеткізетіндігін айтып, сенімдеріне кіріп, 5 тұрғынды алдап үлгерген. Ол жалған парақшасында жиһаз сатылып, жеткізетінін хабарлап, тұтынушыдан алдын-ала төлем жасауын сұраған. Ақшаны алғаннан кейін, сол күйі кері байланысқа шықпаған. Жәбірленушілерге 1 миллион теңгеден аса шығын келтірген. Оның да ісі сотқа өтті, - дейді Алмас Мырзахметов.
Белгілі заңгер Сағидолла Баймұрат БАҚ-қа берген сұхбаттарының бірінде құқықтық сауаттылықтың төмендігі қарапайым азаматтық құқықтық шарттар жасаспауымен сипатталатынын айтқан. «Өйткені адамдар күнделікті тірлігін оңай шешемін деп ойлап, қарапайым сауатты адамның жасайтын дүниелерін істемейді. Оның қатарында еңбек шарты, азаматтық, құқықтық шарттар бар. Мәселен, біреуден қызмет не зат сатып алатын кезде шарт жасаспайды. Ал шарт жасалмағаннан кейін құқықтық қатынастарды дәлелдеу мүмкін емес. Мысалы, Астана мен Алматыда мүлікті жалға алу көрсеткіші өте жоғары. Осы бойынша да көпшілік келісімшартқа отырмағандықтан соның зардабын шегеді. Сондықтан қарапайым деңгейдегі жазбаша келісімшарт мәселесін көтеру керек», дейді заңгер сұхбатында.
Ал білікті заңгер, Парламент Мәжілісінің депутаты Абзал Құспанның келтірген аргументімен де келіспеске амал жоқ. Ол отандастарымызды құқықтық сауат жөнінен екіге бөліп қарастырған. Яғни, қазақтілді азаматтардың сауатының орыстілділерге қарағанда біраз төмен екенін өзінің өмір тәжірибесінен алып отыр. «Бұл мәселе өте өзекті. Мен қазақтілді ортаның құқықтық сауаттылық деңгейін арттыру мәселесін көтеріп жүрмін. Бұл мәселені мемлекеттік деңгейде қолға алып, айналыспайтын болсақ, Қаңтар оқиғасы секілді жағдайлар қайталануы мүмкін. Сондықтан да қазақтілді ортаның құқықтық сауаттылық мәселесін дереу қолға алу керек», деген пікірін жеткізді.
«World Justice Project» деген халықаралық үкіметтік емес ұйым бар. Осы ұйымның зерттеуінше, Қазақстан «Заң үстемдігі» индексі бойынша 2021 жылы 66-орынға тұрақтаған екен. Түсінікті болу үшін заң үстемдігі индексін сипаттап берсек. Бұл – әлем елдеріндегі құқықтық мемлекеттің қағидаттарына негізделген және құқықтық ортамен қамтамасыз етілуі жағынан жеткен жетістіктерін бағалайтын зерттеудің қорытындысы. Нақтылай түссек, бағалау индексі 8 фактор мен 44 көрсеткіш нәтижесінің жиынтығы. Көрсеткіштерге көз жүгіртсек, жылдан-жылға зерттеуге қатыстырылған елдер саны артып келе жатқаны байқалады. Айталық, 2020 жылы аталған ұйым 128 елді индекстесе, 2021 жылы олардың санын 139-ға көбейткен. Бұл тізімде Дания алты жыл бойы алдына жан салмай, көш бастап келеді екен. Дания бастап тұрған үздік бестіктің келесі орындарына Норвегия, Финляндия, Швеция және Германия орналасқан. Ал біздің еліміз 0,52 балмен 66-орынға тұрақтап, мұның алдындағы зерттеу қорытындысынан 3 позицияға жоғары көтерілген екен. Байқасаңыздар, негізінен дамыған елдерде заңның үстемдігі басым, сәйкесінше азаматтардың құқығын қорғау көрсеткіші де жоғары. Сол себепті де мұндай елдерде тәртіп пен қауіпсіздік салтанат құрған. Қалай дегенмен Қазақстан жайғасқан орын еңсені түсіретіндей емес. Яғни Молдова (73 орын), Украина (74 орын), Беларусь (97 орын), Ресей (101 орын) сынды елдердің алдында тұрғанымыз да жетістік.
Біз тәуелсіздік алып, өз алдымызға азат ел болсақ та заңымыздың тілі әлі қазақшаланар емес. Бұл әрине, біріншіден, кеңестік кезеңнен заң шығару саласында қалыптасып қалған «қағида» болса, екіншіден, көпшілік заңгерлердің, осы саладағы ғалымдардың қазақ тіліне шорқақтығы да шешуші фактор болып тұр. Бір сөзбен айтқанда, бізде әлі де қазақтілді білікті заңгерлер аз.
Зерттеулерге сүйенсек, күнделікті ғаламтордағы ақпараттар ағынын зерделесек, дамушы елдерге қарағанда көбіне дамыған елдердегі адамдардың құқығын қорғау тетіктері жақсы жұмыс істейді. Оның ар жағында сол елдердің халқының өз құқықтарын, елінің басты заңының талаптары мен міндеттерін бес саусақтай білетіні «менмұндалайды». Яғни әр азамат құқығының қорғалуы үшін өзі де оған мүдделі болуы керек.
А.Құспан: «Әлем елдеріндегі құқықтық сауаттылық деңгейі әртүрлі. Мәселен, Еуропа мен Америкада жоғары. Ол жақта кез келген мәселеге адам құқығы тұрғысынан келеді. Ал біздің посткеңестік елдерде мәселеге мемлекеттік мүдде тұрғысынан қарайды. Батыс елдерінде жеке адам құқығы тұрғысынан келетін болған соң әр адам оқуға, үйренуге мүдделі. Мәселен, АҚШ-та заңгерлер саны бізден әлдеқайда көп. Алайда олар біздегідей прокурор, сот, тергеуші болайын деп емес, «өзім үшін» деген мақсатта үйренеді. Ол жақта адамдардың өздері құқықтарын білуге мүдделі. Оған өмірін өзгертетін фактор ретінде қарайды», дейді. Білікті заңгерлер осы қызметті мансап үшін ғана емес, өз құқығыңды білу үшін үйренуіміз керектігін үнемі айтып келеді. Бұрынғы өткен ер-азаматтардың бес қаруы негізінен жаугершілік замандағы талапқа сай сайланса, бүгінгінің бес қаруы – заңды жетік білу дер едік.
