Қазақстан бойынша табиғи газ бағасы ең жоғары Түркістан облысында көгілдір отын тарифін бекітуде Табиғи монополияларды реттеу комитеті Түркістан облысы бойынша департаментінің ұсыныс-талаптары ескерілмейді. Бұл туралы бүгін аталған департаменттің басшысы міндетін атқарушы Қанат Бейсенов өңірлік коммуникациялар қызметінде мәлімдеді.
– Газ тарифін бекіту Шымкент қаласында жүргізіледі. Біздің ұсыныс-пікірлеріміз жүзеге аспайды. Оған қатысты департамент ешқандай шара қолдана алмайды. Өйткені реттеуші болып Шымкент қаласы бекітілген. Газ мәселесіне қатысты департаментке күніне кем дегенде екі-үш шағым түседі. Оны біз қарамаймыз. Тарифке қатысты болса, Шымкент қаласына жолдаймыз. Ал, жақпаған газға төлем талап етсе, онымен тікелей Энергетика министрлігі айналысады. Ол бойынша тексеретін мекеме Қызылорда облысында, – деді Қанат Қымбатұлы.
Департамент басшысы міндетін атқарушының айтуынша, газға қатысты тариф биыл өзгеріссіз қалдырылған.
