Мешіт, ғибадат үйлерін салу үшін Сәулет және қала құрылысы басқармасынан рұқсат алу қажет. Бұл туралы бүгін Түркістан өңірлік коммуникациялар қызметінде аталған облыстық басқарманың басшысы міндетін атқарушы Бақтыбай Дүйсебеков мәлімдеді.
– 2019 жылы біз бір мешітті салуға рұқсат бердік. Өкінішке қарай, бүгінде азаматтар аудандарда, қалаларда бізден рұқсат алмай мешіттер құрылысын жүргізіп жатыр. Облыс бойынша шамамен 20 шақты. Ғибадат үйлерінне қойылатын стандарттарға сай талаптар бар. Ертең қабылдау актілерін алған кезде, құжаттандырғанда солар үлкен проблема бола ма деп отырмын. Сондықтан орай келіп тұрғанда сіздер арқылы бұқаралық ақпарат құралдарының көмегімен хабарлап, оларды басқармаға келіп, тиісті құжаттарын өткізіп, заңдастыруға шақырамын. Дегенмен, оларға Қоғамдық даму басқармасының дін мамандарымен түсіндіру жұмыстары жүргізіліп жатыр. Құжаттарын заңдастырмаса болмайды, – деді Сәулет және қала құрылысы басқармасының басшысы міндетін атқарушы.