Саурандық Розахмет Набиханұлы 6-сыныпта алғаш рет мектеп табалдырығын аттады. 12 жасар оқушыны мектептегі достары сән-салтанатымен күтіп алды! Розахмет туғанынан ерекше балалар қатарында. Үйінде жеке оқыту әдісімен білім алуда. Десе де оның болашаққа деген мақсаты айқын.
Соңғы үш жылда Розахметтің дамуына ұстазының қосқан үлесі мол. Өзі информатика пәнінің мұғалімі болса да, шәкіртін түрлі қосымшалар мен үйірмелерге баулыған.
Бүгінгі қуанышына дәл осы өнерге деген құштарлығы сеп болыпты. Құрылыс компаниясы оның республикалық байқауда көрсеткен өнеріне тәнті болған. Байқаудан кейін соңғы үлгідегі қол арбаны сыйға тартып, 2 аптаның ішінде мектеп пен үй арасына жол төсепті. Енді Розахмет демеушілер салып берген жолмен әр жұма сайын мектепке келеді.Қалған сабақтарды үйінде оқиды. Бұл оқушының өз қалауы. Отбасында үш перзенттің кенжесі Розахмет тумасынан ерекше болып, 6 жасынан ән айтуды өзінің хоббиі ретінде көрді.
Бірнеше қашықтық сайыстарға қатысып, өз білімін шыңдап жүріп, мәнерлеп оқу сайыстарынан марапаттарға ие болды.Атап айтқанда 2019 жылы қазан айында Лидер kz сайтында ұйымдастырылған балалар мен жасөспірімдерге арналған Республикалық байқауына қатысып, бас жүлдені алды.2022 жылдың сәуір айында өтілген «Жұлдызай» ХҮІІ Республикалық балалар шығармашылығы фестиваліне қатысып, 1-орынды иеленді. Халықаралық «Central Asia`s Got Talent» телевизиялық шоудың қатысушысы болып, «Аңсайды жаным» әнін орындады. Астана қаласында өтілген «Арман асулары» Республикалық фестивалге арман қуып барған Розахмет вокалдық өнер жанры бойынша өнер көрсетіп, «Мейірім» атты өзіне арнап жазылған клипінің тұсаукесері болып, "Дипломмен" марапатталды. Осылайша, “Артрогрипоз” дертімен туған Розахмет—өзінің ерекше дауысымен көзге түсіп, талайды тамсандырып жүрген өнер иесі.
