Кәсіптің көзін тапсаң кез-келген бизнестен пайда табуға болады. Әрине кәсіп бастау оңай емес. Тәжрибе, білімді, еңбекті айтпағанда іс бастау үшін алдымен қаражаттың керегі анық. Мұндай азаматтарға елімізде барынша қолдау көрсетіліп келеді. Мысалы «Еңбек» мемлекеттік бағдарламасы кәсіп ашқысы келетін жандарға көмекке келе алады.
Осы ретте Шымкент қаласында «Еңбек» мемлекеттік бағдарламасының ІІ бағыты шеңберінде жаппай кәсіпкерлікті дамыту ісі сәтті жүзеге асырылып келеді.Бұл кәсіппен айналысамын деген жергілікті тұрғындар үшін үлкен мүмкіндік. Мемлекеттік қолдаудың арқасында бизнес идеясын жүзеге асырып, жаңадан кәсіп ашқандардың бірі – Жанна Беркімбаева.
Ол былтырғы жылдың қыркүйек айында «косметология» бағыты бойынша комиссияға өз бизнес-жоспарын ұсынған. Нәтижесінде жобасы мақұлданып, 200 АЕК(555 650 тг) көлемінде грантқа қол жеткізді. - Былтыр «Атамекен» палатасы жанындағы «Бизнес бастау» курсына қатыстым. Қолыма сертификат алған соң, мемлекеттік грантқа құжат тапсырдым. Мемлекеттік қолдаудың арқасында өз ісімізді бастадық. Қазіргі таңда косметология кабинетінде бет тазарту, қасты түзету, бояу және т.б. бағыттар бойынша қызметтер көрсетемін. Косметология қызметіне жүгінетін қыз-келіншектер көп-дейді кәсіпкер.
Жалпы, Шымкентте былтыр 4828 адам мемлекеттік грантқа қол жеткізді. Оның ішінде 407-сі көп балалы отбасы мүшелеріне, 2122 -аз қамтамасыз етілген отбасыларға, 29-мүгедек азаматтарға ,1075-сі жастарға және 1195 өзге санаттағыларға берілді. Биыл 600 азамат грантқа қол жеткізіп, өз мүмкіндіктерін жүзеге асыруда.