Шымқалада шағын және орта кәсіпкерлік саласы қарқынды дамып келеді. Қаладағы «Тассай» индустриялды аймағында бүгінде қыз-қыз тіршілік қайнап жатыр. Отандық өнімдерді өндіру барысымен жақында қала әкімі Ғабидолла Әбдірахымов танысып қайтты.
Қала басшысы алдымен аймақтағы «ҚазТехникас» ЖШС-нің жұмысына куә болды. Мұндағы өндіріс орнында жарықтандыруға арналған диодты көше және кеңсе шамдары дайындалады. Айта кетейік, бұл - еліміздің Оңтүстік аймағында диодты жарық шамдарын шығаруды қолға алған алғашқы кәсіпорын. Қуаттылығы жылына 18 мың дана көше, 36 мың кеңсе шамын шығаруға жетеді. Жоба құны 500 млн. теңгені құрайды. Кәсіпорын екі жылдан бері 40-тан астам адамды жұмыспен қамтып келеді. Орташа жалақы - 110 мың теңге.
Өндіріс орнын аралау барысында қала әкімі «ҚазТехникас» ЖШС директоры Сәбит Мұратқа сәттілік тілеп, жұмыстарына оң баға берді. Алдағы жоспарларын тілге тиек еткен кәсіпорын басшылығы цехтағы қолмен істелетін жұмысты автоматтандыруға кіріскендерін айтты. Бұл өз кезегінде жарықты үнемдеуге септігін тигізбек.