Шымкентте 2015 жылдан бастап «Төменкөміртекті дамуға арналған тұрақты қалалар» бағдарламасы жүзеге асырылып келеді. Бағдарламаға сәйкес қала атмосферасын тазарту жұмыстары жүргізіліп келеді. Соңғы уақытта Шымкентте ауаның ластану көрсеткіші төмендеген. Бұрынғы жылдармен салыстырғанда қаладағы атмосфераға тарайтын улы заттар мөлшері азайыпты дейді ауаға мониторинг жасайтын мамандар. Шымкентте қазіргі таңда атмосфераның құрамын зерттеп, мониторинг жасайтын алты станция жұмыс істеп тұр. Оның төртеуінен сынаманы мамандар өздері алса, екі бекеттің жұмысы автоматтандырылған. «Біздің мамандар төрт бекеттен күніне үш рет арнайы құрылғымен ауа температурасын, қысымын, құрамын өлшеп, нәтижесін стансаға алып келеді. Мұнда әкелінген соң сынамаға зертханада химиялық талдау жасалады. Егер ауа құрамында өзгерістер байқалса, тез арада эколог-мамандарды хабардар етеміз», – дейді зертхана меңгерушісі Гүлнар Мәуленова. Меңгерушінің айтуынша, алып қаланың экологиялық ахуалын қалыпты жағдайда ұстау қатаң бақылауға алынады. Осы мақсатта қазіргі таңда қаланың тағы үш нүктесінен ауа құрамына сынама жүргізетін автоматты бекет салу жұмыстары басталып кеткен.