Мегаполистердің қатарын толықтырған Шымкент қаласында биыл абаттандыру жұмысы жандана түсті. Әсіресе тұрғындар Еңбекші ауданында Бекет батыр көшесінде орналасқан гүлзардың ашылуына ерекше қуанды. Сондай-ақ талай жылдан бері арнасы батпақ пен қоқысқа толып жатқан Шымкент каналының бойы да көріктендірілді. 12-шағынауданда орналасқан бұл каналды абаттандыру жұмыстары демеушілер есебінен жүргізілді. Аудандық әкімдіктің инфрақұрылым және көріктендіру бөлімінің басшысы Бахтияр Тұрабековтың айтуынша, аудан аумағының тазалығын сақтап, көгалдандыру мақсатында жыл басынан бері 7 рет сенбілік ұйымдастырылыпты. «Сенбілік өткізу барысында шағынаудандарда - 3 500, ал индустриалды аймақ пен тұрғын алабтарда тағы 5 725 ағаш көшеті егілді. Аудан аумағында ирригациялық жүйелерді қажет ететін көшелер зерттеліп, нәтижесінде 18-шағынауданға - 652 метр, Күншығыс шағынауданына - 240 метр, Жанқожа батыр көшесіне - 180 метр, Безделев-Түркістан көшелерінің қиылысы, Мельникайте көшесіне (Қазбакалейторг аумағы) 200 метр ирригациялық жүйе қажет екені анықталды. Әкімдік қызметкерлері осыған байланысты жобалық-сметалық құжаттар әзірлеп, бюджетке ұсынды. Жұмыстар қаржы бөлінген соң атқарылады, - дейді бөлім басшысы.