Шымкенттегі бір ғасырға жуық тарихы бар орталық саябаққа биыл құрылыс жұмыстары жүргізілуде. Аумағы 8 гектарды құрайтын демалыс орнында бүгінде жаңа орындықтар мен қоқыс жәшіктері орнатылуда. Сондай-ақ, мұнда 15 кісіге арналған 3 сәкі де қойылады.
Саябақта бүгінде 56 орындық пен бірнеше құты алмастырылып үлгерген. Ал ескі орындықтар мен құтылар қайта жөнделіп, қала сыртындағы демалыс орындарына, этносаябаққа және жаңадан қолға алынған шатқалдарға қойылады деген жоспар бар. Айта кетейік, бұл саябақтағы ағаштардың кейбірі - 100, кейінгілері 50-60 жыл бұрын егілген. Жыл сайын мұнда жүздеген жас-дарақ жерсіндіріледі. Былтыр саябақта 40-тан астам қылқан жапырақты ағаш пен 25 ақ қайың егілген. Жалпы биыл Шымқаланың символына айналған қыр гүлінен 1 миллион 37 мың данасы егілді. Қаланы көріктендіруші мамандар гүлдіерді арнайы кескіндердің ізімен еккен. Мәселен қызғалдақтар ұлттық ою-өрнектер, қаланың логотипі мен геометриялық кескін пішінінде егілген.