2019 жылдың үш айында Шымкент қаласының өңірлік өнім көлемі 470 901,1 млн. теңгені құрады. Бүгін Өңірлік коммуникациялар қызметінде өткен брифингте еліміздегі үшінші мегаполистің биылғы қаңтар-маусым айларындағы әлеуметтік-экономикалық даму көрсеткіштерінің қорытындыларын баяндаған Шымкент қалалық Статистика департаментінің басшысы Ерназар Құлтаев осылай деді.
Спикердің сөзіне сенсек, биылғы бірінші тоқсанның қорытындысы бойынша Шымкент қаласының өңірлік өнім көлемінде өткен жылғы алғашқы үш айдың нәтижесімен салыстырғанда айтарлықтай өсім бар.
– 2019 жылғы I тоқсандағы жалпы өңірлік өнім көлемі 470 901,1 млн. теңгені құрап, өткен жылдың алғашқы үш айымен салыстырғанда 2 пайыға артты. Жалпы өңірлік өнімнің құрылымында өнеркәсіп үлесі – 32,6 пайыз, көлік және қоймалау – 15,6 пайыз, көтерме және бөлшек саудада автомобильдерді және мотоциклдерді жөндеу 13,9 пайызды алып отыр. Жалпы өңірлік өнім бойынша қала республика өңірлерін орналастыру тәртібінде және халықтың жан басына шаққандағы есебінде 11 орынды иемденді, – деді департамент басшысы.