Шымкентте жолаушылар тасымалдау саласында тағы жаңа 2 бағыт ашылды. «Shymkent» әлеуметтік кәсіпкерлік корпорациясы» өкілдерінің мәліметінше, №113 және №10 бағыттарда жаңа автобустар қатынауда.
№113 бағытындағы жаңа жолаушылары көліктері Нұрсәт-3 шағынауданынан шығып, әкімшілік іскерлік орталық арқылы Нұрсәт шағынауданын толықтай аралап, орталық саябақ, Қырғы базарды қамтып, Леңгір қаласына барар жолмен №7 Шымкент қалалық емханасына дейінгі аралықта жолаушылар тасымалдайды. Нұрсәт-3 шағынауданы мен №7 емхана арасы 16,5 шақырымды құрайды. Сол сияқты қаланың бір жақ шетіндегі Сәуле шағынауданы тұрғындарын әкімшілік іскерлік орталығына бір автобуспен қатынауға мүмкіндік беретін №10 жаңа бағыттың да соңғы аялдамасы Нұрсәт-3 шағынауданы. Бұл екі аралық 23 шақырым екен.
Еске салайық, 19 маусым – қала күніне орай Шымкентте жаңа «Shymkent Bus» автобус паркі ашылған болатын. Сол күні мегаполиске жаңа 160 автобус жеткізілген еді. Олардың біразы 4-5 бағытты жаңалап, «ГАЗель» көліктерін алмастырды.