Шымкент – бұрыннан туристерге тартымды шаһар, қалада зәулім қонақүйлер, дәмханалар бар, дендросаябақ, зообақ, тағы басқа көрікті орындар жетерлік. Олар Шымкенттің шынайы мақтанышы, қалаға келген қонақтарға да ерекше жылы шуақ, естен кетпес әдемі әсер сыйлайтыны рас. Дегенмен, мұның бәрі бірлесіп жұмыс істемеген. Яғни әрқайсысы өз қазанында қайнап, өз бетінше әрекет етіп жатыр. Қазіргі таңда Қазақстан Республикасының туризм саласын дамытудың 2019 – 2025 жылдарға арналған мемлекеттік бағдарламасы аясында – осы туристік маршруттар біріктіріліп, бір-бірімен тығыз байланыс орнатып, бірлесіп жұмыс істеуіне жол ашылуда. Қаланың көрікті орындарын көрсететін арнайы туристік маршрут ашу да жоспарланған. Ол маршруттардың арақашықтығы 30 минуттан болады.
Сондай-ақ аталмыш бағдарлама шеңберінде Шымқалада туристік полиция құрылған. Оған Шымкент қаласы Полиция департаменті конкурс жарияланып, мамандар іріктеліп алынды. Шымкент қаласының Полиция департаментінің Патрульдік полиция полкінің Туристік полициясы Арбатта өз жұмысын бастағалы бері қала қонақтарына өз қызметін көрсетіп келеді. Атап айтсақ, Туристік полицияның қызмет көрсету жөніндегі инспекторы полиция аға лейтенанты Диана Есенгельдиева күнделікті қала қонақтары мен өзге ұлт өкілдеріне өз жұмысы туралы түсіндіріп, барлық сұрақтарына жауап беруге тырысады. Туристік полицияда қызмет ету үшін ағылшын, орыс және қазақ тілдерін еркін меңгеру керек. Осындай қасиеттері бойына сіңген Диана Есенгельдиева күнделікті «Бұл қандай бекет?» деп сұраған азаматтарға толық мәлімет береді.
Туристік полицияның басты міндеті - келген туристер мен қонақтарға қызықтырған сұрақтар бойынша кеңестер, ақпараттар беру. Сондай-ақ, шетелдіктерді және инвесторларды тарту үшін, шетел азаматтарының елімізге келген кездегі қауіпсіздігі мен жайлылығын қамтамасыз ету үшін қызмет атқарады.
Туристік полиция қызметкерлері бейнетіркеуіштермен, планшеттермен, рациямен жабдықталған. Олар мемлекеттік тілді, орыс және ағылшын тілдерін, еліміздің тарихын білуі тиіс. Сондай-ақ, адамдармен тез тіл табыса білетін және жедел әрекетке әрдайым дайын болуы керек.