Адамзаттың саналы тіршілігіндегі ең үлкен жетістігі – кітап шығару өнерін игеруі десек, титтей де артық айтқандық емес. Өйткені өркениетті қоғам білімді, зерделі ұрпақ танымына тікелей тәуелді. Оған Мемлекет басшысы Қасым-Жомарт Тоқаев та өзінің халыққа Жолдауында айрықша мән беріп, ХХІ ғасырдағы қазақтың болмысы деген мәселені көтерген болатын. Сонда санамалап көрсетілген негізгі 7 мәселенің бірінші және басты тармағы ретінде қазақ жастары білімді болуы керек деген тұжырым алға шықты. Демек, өркениетті қоғамның басты тірегі – білімде. Ал білімнің кілті – кітапта. Сондықтан Мемлекет басшысы еліміздегі кітапханаларды жаңғырту, қорын ұлғайту және цифрландыру қажеттігін баса айтқан болатын. Президент тапсырмасы үшінші мегаполисте де ойдағыдай атқарылуда.
Шымкент қаласындағы Әл-Фараби атындағы қалалық ғылыми-әмбебап кітапханасы қазіргі таңда оқырмандарға кітапханалық-библиографиялық, ақпараттық қызмет көрсетуде. Бүгінде кітапхана қорында 400 мыңнан астам кітап пен 6546 дана электронды қоры бар. Ал, оқырмандар саны 18 600-ды құраса, келушілер саны 128 000, кітап берілімі 216 000. Мұнда 96 қызметкер еңбек етеді. Кітапхана қазіргі таңда Қазақстанның ұлттық электронды кітапханасы және кітап.kz қорын толықтыруға белсене атсалысуда.
«Цифрлы Қазақстан» мемлекеттік бағдарламасы шеңберінде кітапхана мобильді, смартжоба – QR – кітапхананы жүзеге асырды. Осының арқасында бүгінде 60-қа жуық жергілікті авторлардың көркем шығармаларын оқырмандар кітапхана сайтындағы штрих – код арқылы оқи алады дейді кітапхана мамандары.
Кітапханада оқырмандардың қызығушылығына орай «Жас түлек», «Бәрін білгім келеді», «Мұрагер», «Дидарласу» Libclub «Глобус» мүдделестер клубтары жұмыс істейді. Кітапхана қала аумағындағы кітапханалар үшін ғылыми-әдістемелік орталық болып табылады.