Шымкент-Каир бағыты бойынша Мысырға жаңа бағыт ашылмақ. Екі ел арасындағы ынтымақтастықты одан әрі дамыту мақсатында қазақстандық SCAT әуекомпаниясы бұл маршрутты 29 мамырынан бастап жүзеге асырмақ. Бұл туралы RGmedia.kz тілшісі Көлік министрлігіне сілтеме жасап хабарлайды.
"Көлік министрлігі тұрақты негізде ұшу географиясын кеңейту және қолданыстағы маршруттар бойынша рейстер санын арттыру бойынша жұмыс жүргізуде. Биылғы жылдың 29 мамырынан бастап қазақстандық SCAT әуекомпаниясы Шымкент-Каир бағыты бойынша Мысырға жаңа бағыт ашуды жоспарлап отыр. Рейстер аптасына 2 рет (дүйсенбі және сәрсенбі күндері) Boeing 737-800 және Boeing MAX 8 типті әуе кемелерінде орындалады", - делінген хабарламада.
Сонымен қатар SCAT әуекомпаниясы бұдан бөлек, 2025 жылғы 27 мамырдан бастап Шымкенттен Венгрия астанасы Будапештке, 28 мамырдан бастап Шымкенттен Қытайдың Сиань қаласына тікелей рейстерді ашуды жоспарлап отыр.